لاہور:
اہلِ گجرانوالہ کے لیے خوش خبری ہے کہ وزیراعلیٰ مریم نواز نے ان کے لیے بڑے منصوبے کی منظوری دے دی ہے۔
وزیراعلیٰ پنجاب مریم نواز شریف کی زیر صدارت اہم اجلاس میں گجرانوالہ ماس ٹرانزٹ سسٹم کے ڈیزائن کی منظوری دے دی گئی۔ انہوں نے ہدایت کی ہے کہ گجرانوالہ کے ہر علاقے کو فیڈر بسوں کے ذریعے میٹرو ٹرین سسٹم سے منسلک کیا جائے تاکہ شہریوں کو بہتر سفری سہولتیں فراہم کی جا سکیں۔
اجلاس میں ٹریفک کی روانی بہتر بنانے کے لیے ماس ٹرانزٹ سسٹم میں دو ٹنل سیکشن بنانے کا فیصلہ بھی کیا گیا، جبکہ 17 سے 19 کلومیٹر ٹریک کو انڈرگراؤنڈ گزارنے کی اصولی منظوری بھی دی گئی۔
اس کے علاوہ منصوبے میں ہر اسٹیشن اور ڈپو پر سولر سسٹم نصب کرنے کا بھی فیصلہ کیا گیا ہے تاکہ توانائی کے متبادل ذرائع کو فروغ دیا جا سکے۔
اس موقع پر بریفنگ میں بتایا گیا کہ گجرانوالہ میں 26 لاکھ مسافروں کے سفر کی گنجائش کے لیے یہ ماس ٹرانزٹ سسٹم قائم کیا جائے گا۔ گکھڑ سے ایمن آباد تک 31.5 کلومیٹر طویل اس منصوبے کی تکمیل کے لیے 12 ماہ کی مدت مقرر کی گئی ہے، جبکہ اس میں مجموعی طور پر 24 اسٹیشنز بنائے جائیں گے جن میں 2 اسٹیشنز انڈرگراؤنڈ ہوں گے۔
منصوبے کے تحت گرجاکھ، چن دا قلعہ اور گوندلا والا کے علاقوں میں ڈپو قائم کیے جائیں گے، جبکہ ماس ٹرانزٹ سسٹم کے دونوں اطراف 62 کلومیٹر طویل ڈرین بھی تعمیر کی جائے گی۔ اس کے ساتھ ایک جدید کمانڈ اینڈ کنٹرول سینٹر بھی قائم کیا جائے گا جو نظام کی نگرانی اور آپریشن کو یقینی بنائے گا۔
وزیراعلیٰ مریم نواز شریف نے کہا کہ گجرانوالہ ماس ٹرانزٹ سسٹم کی تکمیل سے شہر کا ٹرانسپورٹ کلچر بدل جائے گا اور شہریوں کو ایک جدید و شاندار سفری نظام فراہم کیا جائے گا۔ انہوں نے کہا کہ گجرانوالہ کے عوام کے لیے یہ منصوبہ ایک اہم تحفہ ثابت ہوگا۔
پی این پی