سعودی عرب نے غیر ملکی سیاحوں کے لیے سفری سہولتیں مزید آسان بنانے کی غرض سے نیا پیکیج ویزا پروگرام متعارف کرا دیا ہے۔ ابتدائی مرحلے میں اس اسکیم سے پاکستان، بھارت، بنگلہ دیش، انڈونیشیا، اردن، مصر اور میکسیکو کے شہری فائدہ اٹھا سکیں گے۔
سعودی وزارتِ سیاحت کے مطابق اس پروگرام کے تحت مسافروں کو فضائی ٹکٹ، ہوٹل بکنگ اور الیکٹرانک ٹورسٹ ویزا ایک ہی پیکیج میں فراہم کیا جائے گا، جس سے علیحدہ ویزا درخواست دینے کی ضرورت ختم ہو جائے گی۔
میڈیا رپورٹس کے مطابق منظور شدہ ٹریول پیکیج خریدنے کے بعد ای ویزا تقریباً 48 گھنٹوں کے اندر جاری کر دیا جائے گا۔ درخواست گزاروں کو نہ تو سعودی سفارت خانے جانے کی ضرورت ہوگی اور نہ ہی الگ سے ویزا پراسیس مکمل کرنا ہوگا۔ مجاز ٹریول ایجنسی کے ذریعے پیکیج کی بکنگ اور آن لائن ادائیگی کے بعد ویزا، ٹریول انشورنس اور دیگر ضروری سفری دستاویزات ای میل کے ذریعے فراہم کی جائیں گی۔
وزارتِ سیاحت نے اس منصوبے کے پہلے مرحلے کے لیے Reserval اور Almosafer کو مجاز سروس فراہم کنندگان مقرر کیا ہے۔
پیکیج ویزا کی اہم شرائط درج ذیل ہیں:
- ویزا صرف سنگل انٹری ہوگا۔
- ویزا کی مدت تین ماہ مقرر کی گئی ہے۔
- قیام صرف وزارتِ سیاحت سے منظور شدہ چار یا پانچ ستارہ ہوٹلوں میں ممکن ہوگا۔
- الیکٹرانک ویزا کی پراسیسنگ پیکیج میں شامل ہوگی۔
- ابتدائی دو دن کے پیکیج کی کم از کم قیمت 4 ہزار سعودی ریال فی بالغ ہوگی، جبکہ ہر اضافی دن کے لیے ایک ہزار سعودی ریال مزید ادا کرنا ہوں گے۔
- قیام کی کم از کم مدت دو دن اور زیادہ سے زیادہ 88 دن ہوگی۔
- پیکیج میں کنفرم راؤنڈ ٹرپ فضائی ٹکٹ شامل ہونا لازمی قرار دیا گیا ہے۔
سعودی حکام کا کہنا ہے کہ اس نئی سہولت کا مقصد سیاحوں کے لیے سفری عمل کو مزید آسان بنانا، ویزا کے اجراء کا وقت کم کرنا اور مملکت میں بین الاقوامی سیاحت کو فروغ دینا ہے۔
پی این پی