سعودی عرب نے عمرہ ویزہ نظام میں نئی تبدیلی متعارف کرانے کی تیاری شروع کر دی

اسلام آباد (نیوز ڈیسک)سعودی عرب عمرہ ویزہ کے نظام میں ایک نئی سہولت شامل کرنے کی تیاری کر رہا ہے، جس کے تحت ٹرانسپورٹ کی لازمی شرط کے بعد اب کھانے کے واؤچر کو بھی ویزہ پیکج کا حصہ بنانے کی تجویز زیر غور ہے۔ اس تبدیلی سے عمرہ کے اخراجات میں اضافے کا امکان ظاہر کیا جا رہا ہے۔

ذرائع کے مطابق مجوزہ منصوبے کے تحت عمرہ زائرین سے ان کے قیام کے ہر دن کے حساب سے تقریباً 20 سعودی ریال اضافی وصول کیے جائیں گے، اور یہ رقم عمرہ ویزہ کی مجموعی فیس میں شامل ہوگی۔

اطلاعات ہیں کہ اس نئے نظام پر یکم ربیع الاول سے عملدرآمد متوقع ہے۔ ابتدائی مرحلے میں اس کا اطلاق صرف پاکستان، بھارت، بنگلہ دیش اور مصر سے آنے والے عمرہ زائرین پر کیے جانے کا امکان ہے۔

منصوبے کے تحت سعودی عرب کے 10 ہزار سے زائد مقامی ریستورانوں کو نسک (Nusuk) ایپ کے ساتھ منسلک کیا جا رہا ہے۔ ہر زائر کو ایک مخصوص BRN کوڈ فراہم کیا جائے گا، جسے عمرہ ویزہ سسٹم کے ساتھ منسلک کرنے کے بعد ہی ویزہ جاری کیا جا سکے گا۔

تاہم اس حوالے سے سعودی حکام نے ابھی تک کوئی باضابطہ نوٹیفکیشن یا تفصیلی اعلامیہ جاری نہیں کیا۔ توقع ہے کہ سرکاری وضاحت کے بعد اس نئے نظام کے طریقۂ کار اور دیگر تفصیلات سامنے آئیں گی۔