کویت نے فضائی حدود بند کر دی، چوتھی مرتبہ سائرن بج اٹھے

اسلام آباد (نیوز ڈ یسک کویت ایئرویز نے مسافروں کو مطلع کیا ہے کہ ایران کی جانب سے حالیہ حملوں کے بعد کویت انٹرنیشنل ایئرپورٹ پر پروازوں کی آمد و رفت عارضی طور پر روک دی گئی ہے۔

قومی فضائی کمپنی نے اس سے قبل اپنے سوشل میڈیا بیان میں کہا تھا کہ فضائی حدود بند ہونے کی وجہ سے متعدد پروازوں کے شیڈول میں تبدیلی کی جا رہی ہے اور انہیں نئے اوقات کے مطابق ترتیب دیا جا رہا ہے۔ایئرلائن کے مطابق بکنگ کے وقت درج کیے گئے فون نمبروں پر ایس ایم ایس اور دیگر نوٹیفکیشنز کے ذریعے مسافروں کو تازہ صورتحال سے آگاہ کیا جاتا رہے گا۔ادھر ایرانی پاسدارانِ انقلاب نے دعویٰ کیا ہے کہ اس کی بحری فورس نے کویت کی الاحمدی بندرگاہ میں امریکی بحری بیڑے کی ایندھن سپورٹ تنصیب کو نشانہ بنایا، جبکہ بحرین میں واقع شیخ عیسیٰ ایئر بیس پر امریکی جنگی طیاروں کے مقام پر بھی ڈرون اور میزائل حملے کیے گئے۔ایرانی خبر رساں ادارے تسنیم کے مطابق تہران نے یہ دعویٰ بھی کیا ہے کہ بحرین میں امریکی انٹیلیجنس سے متعلق ڈیٹا سینٹر “بیٹیلکو” کو نقصان پہنچایا گیا ہے۔ مزید یہ کہ کویت میں امریکی سگنلز اور ٹیلی کمیونی کیشنز کے ایک مرکز کو بھی ہدف بنانے کا دعویٰ کیا گیا ہے۔

الجزیرہ کے کویت میں موجود نمائندے کے مطابق میزائلوں کو روکنے کی کوششوں کے دوران ملک میں چوتھی مرتبہ فضائی حملے کے سائرن بجائے گئے۔کویتی فوج نے اپنے بیان میں کہا ہے کہ فضائی دفاعی نظام ایران کی جانب سے آنے والے میزائل اور ڈرون حملوں کا مقابلہ کر رہا ہے۔ فوج کے جنرل اسٹاف نے وضاحت کی کہ اگر مختلف علاقوں میں دھماکوں کی آوازیں سنائی دیں تو وہ دراصل دفاعی نظام کی جانب سے دشمن حملوں کو ناکام بنانے کی کارروائی کا نتیجہ ہیں۔