بیجنگ :چین کی قومی عوامی کانگریس کی قائمہ کمیٹی کے چیئرمین چاؤ لہ جی نے بیجنگ میں اردن کے شاہ عبداللہ دوم سے ملاقات کی۔جمعہ کے روز چاؤ لہ جی نے کہا کہ حالیہ برسوں میں صدر شی جن پھنگ اور شاہ عبداللہ دوم کی تزویراتی رہنمائی میں چین۔اردن تعلقات مسلسل گہرے اور مستحکم ہوئے ہیں اور مختلف شعبوں میں تعاون کے نمایاں نتائج حاصل ہوئے ہیں۔ چین اردن کے ساتھ دونوں ممالک کے سربراہانِ مملکت کے درمیان طے پانے والی اہم مفاہمت کو رہنما اصول بناتے ہوئے روایتی دوستی کو آگے بڑھانے، عملی تعاون مضبوط کرنے اور چین۔اردن تعلقات کی مسلسل صحت مند، مستحکم اور پائیدار ترقی کو فروغ دینے کا خواہاں ہے۔انہوں نے کہا کہ چین کی قومی عوامی کانگریس اردن کی قومی اسمبلی کے ساتھ دوستانہ روابط کو مزید گہرا کرنے، ترقی پذیر ممالک کے ارکانِ پارلیمنٹ فورم سمیت مختلف پلیٹ فارمز سے بھرپور استفادہ کرنے اور جمہوریت و قانون کی حکمرانی، عوامی فلاح و بہبود میں بہتری سمیت مختلف شعبوں میں تبادلوں اور باہمی سیکھنے کو مضبوط بنانے کی خواہاں ہے، تاکہ چین۔اردن تزویراتی شراکت داری کے فروغ میں کردار ادا کیا جا سکے۔ شاہ عبداللہ دوم نے کہا کہ اردن عالمی حکمرانی میں چین کی اہم قیادت کو قدر کی نگاہ سے دیکھتا ہے۔ اردن چین کے ساتھ سیاسی باہمی اعتماد کو مزید گہرا کرنے، تجارت و معیشت، سرمایہ کاری اور دیگر شعبوں میں تعاون کو مضبوط بنانے، دونوں ممالک کے قانون ساز اداروں کے درمیان تبادلوں کو فروغ دینے اور مشترکہ خوش حالی و ترقی کے حصول کے لیے کام کرنے کا خواہاں ہے۔