ملتان : صدر ترین ایجوکیشن فاؤنڈیشن علی ترین نے کہا ہے کہ لڑکیوں کی تعلیم معاشی خودمختاری اور سماجی ترقی کی ضامن ہے۔ کسی بھی قوم کی ترقی کے لیے خواتین کو مساوی اور معیاری تعلیمی مواقع اور معاشی تحفظ فراہم کرنا ناگزیر ہے۔
یہ بات انہوں نے ترین ایجوکیشن فاؤنڈیشن کی جانب سے گورنمنٹ گریجویٹ کالج فار ویمن ماڈل ٹاؤن لاہور میں جدید کمپیوٹر لیب کے افتتاح کے موقع پر خطاب میں کہی۔
اس موقع پر ڈائریکٹر ایجوکیشن احسن مختار، چیف ایگزیکٹیو آفیسر ترین ایجوکیشن فاؤنڈیشن اکبر خان اور پرنسپل پروفیسر ڈاکٹر شہناز کوثر بھی موجود تھیں۔ علی خان ترین نے مزید کہا کہ موجودہ دور میں آئی ٹی کی تعلیم کے بغیر ترقی ممکن نہیں، اسی لیے ترین ایجوکیشن فاؤنڈیشن تعلیمی اداروں میں جدید کمپیوٹر لیبز کے قیام پر خصوصی توجہ دے رہی ہے۔لڑکیوں کی تعلیم نہ صرف ان کے حقوق کے تحفظ اور معاشی خودمختاری کو فروغ دیتی ہے بلکہ اس کے مثبت اثرات پورے معاشرے پر مرتب ہوتے ہیں، اور ایک تعلیم یافتہ خاتون آنے والی نسلوں کی بہتر تربیت کی ضامن ہوتی ہے۔خواتین کو ترقی کے یکساں مواقع کی فراہمی سے ہی ملک کی خوشحالی اور اقتصادی ترقی کے اہداف حاصل کیے جا سکتے ہیں۔
