چین کا 42 واں انٹارکٹک مشن اپنی کامیاب تکمیل کے بعد وطن واپس پہنچ گیا

بیجنگ : چین کی وزارت قدرتی وسائل کے زیر انتظام 42 ویں چینی انٹارکٹک مشن اور آئس بریکر "شیوئے لونگ” کی ٹیم اپنی تمام ذمہ داریاں کامیابی سے مکمل کرنے کے بعد چین واپس پہنچ گئی۔ یاد رہے کہ آئس بریکر "شیوئے لونگ” نومبر 2025 کو شنگھائی سے روانہ ہوا اور اس نے 160 دنوں میں 34ہزارناٹیکل میل سے زیادہ کا سفر کیا۔جمعرات کے روز چینی میڈیا کے مطابق موجودہ سائنسی ریسرچ مشن نے شرکاء کی تعداد، معمول کے سازوسامان اور مجموعی کام کے حجم کے لحاظ سے نئے ریکارڈ قائم کیے ہیں۔ چینی سائنسی ریسرچ ٹیم نے جزیرہ نما انٹارکٹکا، بحیرہ کاسموناٹ اور بحیرہ امنڈسن سمیت کلیدی سمندری علاقوں میں 61 اسٹیشنوں پر جامع سروے کامیابی کے ساتھ مکمل کیا ،جبکہ 14 سی بیڈ آبزرویشن آلات کی تنصیب اور واپسی کا عمل بھی مکمل کیا گیا۔ چینی ریسرچ ٹیم نے تین ونٹر ریسرچ اسٹیشنز، انٹارکٹکا کے فضائی اور اندرونی حصوں میں متعدد سروے، نگرانی، پروجیکٹس کی تعمیر، رسد کی فراہمی اور عملے کی نقل و حمل کے فرائض بھی انجام دیئے۔اس مہم کے ذریعے قومی سطح کے پانچ بڑے سائنسی پروگراموں کے تحت 45 تحقیقی منصوبوں کی عملی تکمیل میں معاونت فراہم کی گئی۔