بیجنگ:کمیونسٹ پارٹی آف چائنا کی مرکزی کمیٹی کے سیاسی بیورو کے رکن اور چینی وزیرِ خارجہ وانگ ای نے بیجنگ میں اٹلی کے نائب وزیرِ اعظم و وزیرِ خارجہ انتونیو تاجانی سے ملاقات کی۔
وانگ ای نے کہا کہ چین اٹلی کے ساتھ مل کر دوطرفہ تعلقات کو صحت مند اور مستحکم انداز میں آگے بڑھانے کا خواہاں ہے۔ انہوں نے کہا کہ چین اور اٹلی دونوں قدیم تہذیبوں کے حامل ممالک ہیں جو امن کو اہمیت دیتے ہیں اور کثیرالجہتی نظام کے مضبوط حامی ہیں۔ چین اٹلی کے ساتھ بین الاقوامی اور کثیرالجہتی امور میں رابطہ اور تعاون بڑھانے کا خواہاں ہے تاکہ چین۔اٹلی جامع اسٹریٹجک شراکت داری کی عصرِ حاضر میں اہمیت کو اجاگر کیا جا سکے۔
انتونیو تاجانی نے کہا کہ اٹلی چین کے ساتھ تعلقات کو بڑی اہمیت دیتا ہے اور ایک چین پالیسی پر ثابت قدم ہے۔ انہوں نے کہا کہ اٹلی چین کے ساتھ مل کر جامع اسٹریٹجک شراکت داری کے عملی منصوبوں کو مؤثر انداز میں آگے بڑھانا چاہتا ہے۔ انہوں نے بین الاقوامی امور اور اقوام متحدہ سمیت کثیرالجہتی پلیٹ فارمز پر چین کے اہم کردار کو سراہا اور صدر شی جن پھنگ کی جانب سے عالمی و علاقائی مسائل کے حل کے لیے پیش کردہ تجاویز کی حمایت کا اظہار کیا۔ انہوں نے کہا کہ اٹلی چین کے ساتھ مل کر کثیرالجہتی تعاون کو مزید مضبوط بنانا چاہتا ہے تاکہ عالمی امن، استحکام اور ترقی کو فروغ دیا جا سکے۔
ملاقات کے دوران فریقین نے مشرقِ وسطیٰ کی موجودہ صورتحال پر بھی تبادلہ خیال کیا، جبکہ یوکرین بحران سمیت دیگر بین الاقوامی امور پر بھی اپنے خیالات کا اظہار کیا۔
