ایک میزائل، متعدد نشانے، بھارت کا’’مشن دیویاستر‘‘ کے تحت ایڈوانسڈ اگنی میزائل کا کامیاب تجربہ

اسلام آباد (نیوز ڈیسک)بھارت نے اپنی دفاعی طاقت میں اضافے کے لیے جدید ’’اگنی‘‘ میزائل کا کامیاب تجربہ کر لیا،

جو ایک ہی وقت میں متعدد اہداف کو نشانہ بنانے کی صلاحیت رکھتا ہے۔بھارتی میڈیا رپورٹس کے مطابق یہ تجربہ ریاست اڈیشہ کے ساحل کے قریب واقع ڈاکٹر اے پی جے عبدالکلام آئی لینڈ سے کیا گیا۔ اس دوران ’’ملٹی پل انڈیپینڈنٹلی ٹارگیٹڈ ری اینٹری وہیکل‘‘ یعنی MIRV ٹیکنالوجی استعمال کی گئی، جسے بھارت کی دفاعی حکمت عملی میں اہم پیش رفت قرار دیا جا رہا ہے۔اس جدید نظام کی خاص بات یہ ہے کہ ایک ہی میزائل کے ذریعے کئی مختلف وار ہیڈز یا پے لوڈز فائر کیے جا سکتے ہیں، جو الگ الگ اہداف کو بیک وقت نشانہ بنانے کی صلاحیت رکھتے ہیں۔ دفاعی ماہرین کے مطابق یہ ٹیکنالوجی بحر ہند کے وسیع خطے میں متعدد مقامات کو ایک ساتھ ہدف بنانے میں مدد دے سکتی ہے۔رپورٹس میں کہا گیا ہے کہ اس کامیاب تجربے کے بعد بھارت ان چند ممالک میں شامل ہو گیا ہے جو ایک ہی میزائل سسٹم کے ذریعے متعدد ایٹمی یا روایتی ہتھیار لے جانے کی صلاحیت رکھتے ہیں۔ اس فہرست میں امریکا، روس، چین، فرانس اور برطانیہ شامل ہیں۔

دفاعی ذرائع کے مطابق یہ تجربہ ’’اگنی-5‘‘ میزائل کے جدید ورژن کا تھا، جسے ’’مشن دیویاستر‘‘ کے تحت لانچ کیا گیا۔ اس مشن کا مقصد MIRV ٹیکنالوجی کی کارکردگی، درستگی اور مؤثریت کا جائزہ لینا تھا۔واضح رہے کہ بھارت اس ٹیکنالوجی کا ابتدائی تجربہ گزشتہ برس مارچ میں بھی کر چکا ہے۔ بھارتی وزارت دفاع کے مطابق میزائل کی پرواز اور راستے کی نگرانی زمین اور بحری جہازوں پر نصب ٹریکنگ سسٹمز کے ذریعے کی گئی، جبکہ تمام طے شدہ اہداف کامیابی سے حاصل کر لیے گئے۔