امریکا میں گرل فرینڈ کو قتل کرنے والا بھارتی شہری جرمنی سے گرفتار

اسلام آباد(نیوز ڈیسک)امریکی ریاست ایریزونا میں 19 سالہ کالج طالبہ کے مبینہ قتل کے کیس میں اس کے 20 سالہ بھارتی دوست کو جرمنی سے گرفتار کر لیا گیا ہے۔

غیر ملکی میڈیا کے مطابق مقتولہ کی شناخت جولیسا روبی سالازار کے نام سے ہوئی ہے، جبکہ گرفتار شخص ورون بیچگاری بتایا گیا ہے۔پولیس کے مطابق جولیسا کو یونیورسٹی آف ایریزونا کے قریب واقع اس کے اپارٹمنٹ میں مردہ حالت میں پایا گیا۔ حکام نے بتایا کہ اس کے جسم پر تشدد کے نشانات بھی موجود تھے۔پولیس کو جولیسا کے اہل خانہ کی درخواست پر اس کی خیریت معلوم کرنے کے لیے اپارٹمنٹ بھیجا گیا تھا، جہاں وہ بے ہوشی کی حالت میں ملی۔ واقعے کی تحقیقات آگے بڑھنے پر ورون بیچگاری کو اہم مشتبہ شخص قرار دیا گیا اور اس کے خلاف فرسٹ ڈگری قتل اور اغوا کے الزامات کے تحت گرفتاری کا وارنٹ جاری کیا گیا۔تحقیقات کے دوران معلوم ہوا کہ مشتبہ شخص ٹکسن انٹرنیشنل ایئرپورٹ سے ہیوسٹن گیا اور وہاں سے جرمنی روانہ ہوگیا۔ امریکی حکام نے جرمن اداروں کے تعاون سے اسے جرمنی میں گرفتار کرلیا،

جبکہ اسے واپس ایریزونا لانے کے لیے حوالگی کا قانونی عمل جاری ہے۔پولیس کے مطابق تفتیش میں یہ بھی سامنے آیا کہ مقتولہ کا موبائل فون اور کریڈٹ کارڈز مبینہ طور پر ورون کے قبضے میں تھے۔ اس کے علاوہ جولیسا کے اہل خانہ کو بھیجے گئے بعض پیغامات نے بھی خاندان کے خدشات میں اضافہ کیا تھا۔رپورٹس کے مطابق ورون کے خلاف ماضی میں گھریلو تشدد سے متعلق الزامات بھی سامنے آچکے ہیں۔ تاہم موجودہ قتل کیس میں عائد الزامات ابھی عدالت میں ثابت ہونا باقی ہیں اور ملزم کو قانونی کارروائی مکمل ہونے تک بے گناہ تصور کیا جائے گا۔