بانی پاکستان کے مزار پر چیف جسٹس کی حیثیت سے حاضری اعزاز کی بات ہے، قاضی فائز عیسیٰ

چیف جسٹس پاکستان جسٹس قاضی فائز عیسی نے کہا ہے کہ بانی پاکستان قائد اعظم محمد علی جناح کے مزار پر چیف جسٹس کی حیثیت سے حاضری اعزاز کی بات ہے۔
جسٹس قاضی فائز عیسی نے مزار قائد کراچی پر حاضری دی۔ بابائے قوم کی قبر پر پھول چڑھائے اور فاتحہ خوانی کی۔ ان کی اہلیہ سرینا عیسیٰ بھی ان کے ہمراہ موجود تھیں۔ چیف جسٹس نے مہمانوں کی کتاب میں اپنے تاثرات درج کرتے ہوئے لکھا کہ بانی پاکستان قائد اعظم کے مزار پر چیف جسٹس کی حیثیت سے حاضری اعزاز کی بات ہے۔
چیف جسٹس نے مزید لکھا کہ قائد جیسے عظیم رہنما کی جمہوری جدوجہد کے نتیجے میں خطے کے سب سے زیادہ آبادی والا مسلم ملک وجود میں آیا۔ 75 سال بعد ہمیں یاد دلاتا ہے کہ برداشت، رواداری اور صرف جمہوری نظام ہی اس وژن کو برقرار رکھتا ہے۔ قائد اعظم کا نصب العین اتحاد ، تنظیم اور یقین محکم تھا
انہوں نے لکھا کہ چونکہ قائداعظم کی ہمشیرہ ہمیشہ ان کے ساتھ رہی ہیں، ان کی مثال کو مدنظر رکھتے ہوئے میری اہلیہ سرینا عیسیٰ بھی قائد اعظم کو خراج عقیدت پیش کرنے کے لیے میرے ساتھ موجود ہیں۔ چیف جسٹس قاضی فائز عیسی کی اہلیہ سرینا عیسیٰ نے بھی مہمانوں کی کتاب پر دستخط کیے۔