بیجنگ:وزیراعلیٰ پنجاب مریم نوازشریف 8 روزہ سرکاری دورے پر چین پہنچ گئیں، وزیراعلیٰ پنجاب مریم نواز شریف چین کا دورہ کرنے والی پہلی پاکستانی خاتون وزیراعلیٰ ہیں، وہ 8 سے 15 دسمبر تک چین کا دورہ کریں گی۔
ترجمان پنجاب حکومت کے مطابق سینیٹر پرویز رشید، سینیئر صوبائی وزیر مریم اورنگزیب، وزیر اطلاعات و ثقافت عظمیٰ زاہد بخاری، وزیر ٹرانسپورٹ بلال اکبر، وزیر زراعت عاشق کرمانی سمیت اعلیٰ سطح وفد بھی وزیراعلیٰ کے ہمراہ ہے۔
وزیراعلیٰ مریم نوازشریف بیجنگ، شنگھائی، شن ژین اور گوانگ ژو کا دورہ کریں گی۔ وہ چین کے وزرا، اعلیٰ حکام اور ماہرین سے ملاقاتیں بھی کریں گی جبکہ مختلف تقاریب اور کانفرنسز میں شرکت بھی کریں گی۔
یاد رہے کہ وزیراعلیٰ مریم نواز شریف کو چین کی حکمران جماعت کمیونسٹ پارٹی آف چائنا کی طرف سے دورہ چین کی دعوت دی گئی ہے۔
