پشاور:چینی سفیر جیانگ زائیدونگ نے پشاور میں بین الاقوامی سیمینار سے ویڈیو خطاب میں پاکستان کے ساتھ چین کے اٹوٹ تعلقات اور چین-پاکستان اقتصادی راہداری (CPEC) کے اگلے مرحلے کو تیز کرنے کے عزم کا اعادہ کیا۔
یہ سیمینار چائنا ونڈو، ہائر ایجوکیشن کمیشن (HEC) اور انسٹیٹیوٹ آف مینجمنٹ سائنسز (IMSciences) کے اشتراک سے منعقد ہوا، جس میں مختلف شعبہ ہائے زندگی سے تعلق رکھنے والے افراد نے شرکت کی، جن میں ماہرین تعلیم، صحافی، تاجر، اور سفارتکار شامل تھے۔
سفیر جیانگ نے چینی سفارتخانے کی جانب سے نیک خواہشات کا اظہار کیا اور پاکستان و چین کی دوستی کو فروغ دینے والے تمام اداروں کی کوششوں کو سراہا۔ انہوں نے حالیہ بیجنگ کانفرنس برائے ہمسایہ ممالک سے تعلقات کا حوالہ دیتے ہوئے صدر شی جن پنگ کے "مشترکہ مستقبل کے حامل معاشرے” کے وژن کو اجاگر کیا، جو باہمی اعتماد، ترقی اور علاقائی انضمام پر مبنی ہے۔
انہوں نے سی پیک کے نمایاں ثمرات کا ذکر کیا، جن میں 25.4 ارب ڈالر کی براہ راست سرمایہ کاری، 2لاکھ 36ہزارنوکریاں، اور بجلی، ہائی ویز، اور گوادر نیو انٹرنیشنل ایئرپورٹ جیسے بڑے انفراسٹرکچر منصوبے شامل ہیں۔
انہوں نے صحت کٹس کی تقسیم، خیبرپختونخوا میں اسکولوں کی تعمیرِ نو، اور بچوں کے دل کے امراض کا مفت علاج جیسے اقدامات کو چین-پاکستان "آہنی دوستی” کی علامت قرار دیا۔
سفیر جیانگ نے نئی عوامی فلاحی اسکیموں کا اعلان بھی کیا، جن میں سولر پاورڈ سسٹمز، فوڈ پیکجز، صاف پانی کی فراہمی اور خاص طور پر خیبر پختونخوا کے طلبہ کے لیے اسکالرشپ پروگرام شامل ہیں۔
انہوں نے اعلان کیا کہ جلد ہی پاکستان کے مختلف طبقہ ہائے فکر سے تعلق رکھنے والے افراد کو سنکیانگ (Xinjiang) کے دورے پر مدعو کیا جائے گا تاکہ ثقافتی روابط کو مزید فروغ دیا جا سکے۔
بین الاقوامی امور پر بات کرتے ہوئے، انہوں نے امریکہ کی جانب سے غیرمنصفانہ تجارتی محصولات پر شدید تنقید کی اور کہا کہ یہ اقدامات نہ صرف WTO قوانین کی خلاف ورزی ہیں بلکہ عالمی اقتصادی نظام کو عدم استحکام سے دوچار کر رہے ہیں۔ انہوں نے زور دیا کہ چین اور پاکستان سچے کثیرالجہتی (Multilateralism) اور منصفانہ تجارتی نظام کے لیے مل کر کھڑے رہیں گے۔
سفیر جیانگ نے یاد دلایا کہ 2025 میں صدر شی جن پنگ کے تاریخی دورہ پاکستان کو 10 سال مکمل ہو رہے ہیں۔ اس موقع پر چین سی پیک کے "اپ گریڈڈ ورژن” کو فروغ دینے اور دونوں ممالک کے لیے مشترکہ خوشحال مستقبل کی تعمیر کے لیے پرعزم ہے۔
سیمینار کا پہلا دن چین کے پاکستان کی ترقی میں مثبت کردار اور تعلیم، انفراسٹرکچر اور ثقافتی تبادلوں میں مزید تعاون کی ضرورت پر اتفاقِ رائے کے ساتھ اختتام پذیر ہوا۔
