غیر ملکی مداخلت کی تمام کوششوں کا بھرپور مقابلہ کیا جائےگا، چینی وزارت دفاع

بیجنگ :پی ایل اے ایسٹرن تھیٹر کمانڈ کے ترجمان سینئر کرنل شو چھنگ ہوا نے کہا کہ 17 اپریل کی صبح چار بجکر دو منٹ سے پانچ بجکرپچاس منٹ تک جاپانی ڈسٹرائیر بحری جہاز "اکازوچی” آبنائے تائیوان سے گزرا، جس نے "تائیوان کی علیحدگی پسند” قوتوں کو غلط پیغام بھیجا۔ چینی پیپلز لبریشن آرمی کی ایسٹرن تھیٹر کمانڈ نے پورے عمل کی نگرانی کے لیے بحری اور فضائی افواج کو منظم کیا، اور مؤثرکنٹرول کو نافذ کیا۔ اس حوالے سے چینی وزارت دفاع کے ترجمان زانگ شیاؤگانگ نے کہا کہ آبنائے تائیوان میں جاپانی سیلف ڈیفنس فورسز کی دانستہ اشتعال انگیزی نے "تائیوان کی علیحدگی پسند” قوتوں کو غلط اشارہ فراہم کیا، جس سے چینی عوام کے غصے میں مزید اضافہ ہو گا اور جاپان کی اشتعال انگیز کارروائی کا مقابلہ کرنے کے لیے ان کے عزم کو تقویت ملے گی۔ چین جاپان پر زور دیتا ہے کہ وہ ایک چین کے اصول اور چین اور جاپان کے درمیان چار سیاسی دستاویزات کی روح کی پاسداری کرے اور غلط راستے پر مزید آگے نہ بڑھے۔ چینی فوج ہائی الرٹ پر رہتے ہوئے غیر ملکی مداخلت کی تمام کوششوں کا ثابت قدمی کے ساتھ مقابلہ کرنے اور قومی خودمختاری اور علاقائی سالمیت کے تحفظ کے لیے تیار ہے۔