چین سے سامان لانے والے تاجروں کے لیے ٹیکس چھوٹ! بڑی خوشخبری آگئی

اسلام آباد (نیوز ڈ یسک )گلگت بلتستان میں چین سے درآمدات کرنے والے رجسٹرڈ تاجروں کے لیے ٹیکس میں رعایت کے حصول کو آسان بنانے کی غرض سے ایک نیا آن لائن پورٹل متعارف کرا دیا گیا ہے۔

تفصیلات کے مطابق وفاقی حکومت کی جانب سے فراہم کردہ 4 ارب روپے کی ٹیکس چھوٹ سے فائدہ اٹھانے کے لیے یہ جدید نظام قائم کیا گیا ہے۔ نگران وزیراعلیٰ جسٹس (ر) یار محمد نے اس پورٹل کا باقاعدہ افتتاح کیا۔اس ڈیجیٹل پلیٹ فارم کا مقصد چین سے سامان درآمد کرنے والے تاجروں کو شفاف اور منظم انداز میں ٹیکس چھوٹ کے سرٹیفکیٹس جاری کرنا ہے۔ حکام کے مطابق اس نظام کو زیادہ قابلِ اعتماد بنانے کے لیے اسے نادرا اور ایس سی او کے ڈیٹا بیس سے منسلک کیا گیا ہے۔افتتاحی تقریب کے دوران سیکریٹری کامرس و انڈسٹریز نے وزیراعلیٰ کو اس پورٹل کے طریقہ کار سے آگاہ کیا۔

اس موقع پر وزیراعلیٰ نے کہا کہ حکومت میرٹ اور شفافیت کو فروغ دینے کے ساتھ عوام کو سہولیات کی فراہمی پر توجہ دے رہی ہے۔ ان کے مطابق یہ اقدام نہ صرف تاجروں بلکہ نوجوانوں اور خواتین کے لیے بھی کاروباری مواقع بڑھانے میں مددگار ثابت ہوگا۔انہوں نے متعلقہ اداروں کو ہدایت کی کہ وفاق کی جانب سے دی گئی اس سہولت سے زیادہ سے زیادہ فائدہ پہنچانے کے لیے مؤثر اقدامات کیے جائیں تاکہ کاروباری سرگرمیوں کو فروغ دیا جا سکے۔