چین اور پاکستان کی افواج کے درمیان قریبی تعلقات ہیں ، چینی وزارت دفاع

بیجنگ :چینی وزارت دفاع کے ترجمان جیانگ بین نے رسمی پریس کانفرنس میں چین اور پاکستان کی افواج کے درمیان تبادلوں اور تعاون کے بارے میں سوال کا جواب دیتے ہوئے کہا کہ چین اور پاکستان کی افواج کے درمیان قریبی تعلقات ہیں، اور ان کے درمیان اسٹریٹجک رابطہ، مشترکہ مشقیں، افرادی تربیت، سازوسامان اور ٹیکنالوجی کے شعبوں میں عملی تعاون کے نمایاں نتائج سامنے آئے ہیں۔ ترجمان جیانگ بین کا کہنا تھا کہ دونوں ملکوں کی بری فوج ، بحریہ اور فضائیہ کے درمیان سلسلہ وار مشترکہ مشقیں اور تربیتی سرگرمیاں دو طرفہ تعاون کے نمایاں منصوبے بن چکی ہیں۔انہوں نے کہا کہ چین پاکستان کے ساتھ مل کر، دونوں ممالک کے رہنماؤں کی اسٹریٹجک رہنمائی کے مطابق، روایتی دوستی کو آگے بڑھانے، اسٹریٹجک رابطوں کو مضبوط بنانے، عملی تعاون کو فروغ دینے اور ایک دوسرے کے بنیادی مفادات کے معاملات میں مضبوط باہمی حمایت فراہم کرنے کے لیے کام کرتا رہے گا تاکہ دونوں افواج کے تعلقات کو مزید بلند سطح تک پہنچایا جا سکے اور نئے عہد میں چین-پاکستان ہم نصیب معاشرے کی تعمیر میں تیزی لائی جا سکے، اور عالمی ترقی اور سلامتی کے فروغ میں کردار ادا کیا جا سکے۔