چینی وزیر خارجہ کی ایران اور امریکہ کے درمیان مفاہمتی یادداشت طے پانے پر پاکستان کو مبارکباد

بیجنگ :چین کے وزیر خارجہ وانگ ای نے پاکستان کے نائب وزیراعظم اور وزیر خارجہ اسحاق ڈارسے ٹیلیفون پر گفتگو کی۔بدھ کے روز چینی میڈیا کے مطابق اسحاق ڈار نے ایران اور امریکہ کے درمیان پہلے مرحلے کی مفاہمتی یادداشت کے حوالے سے بریفنگ دی اور گزشتہ چند ماہ کے دوران پاکستان کی ثالثی کی کوششوں میں چین کی قیمتی حمایت پر شکریہ ادا کیا۔ انہوں نے کہا کہ پاکستان، چین کے ساتھ قریبی روابط اور ہم آہنگی کا خواہاں ہےاور خطے میں پائیدار امن اور استحکام کے فروغ کےلیے مثبت کردار ادا کرتا رہے گا۔وانگ ای نے ایران اور امریکہ کے درمیان پہلے مرحلے کی مفاہمتی یادداشت طے پانے پر پاکستان کو مبارکباد دی۔ انہوں نے کہا کہ بین الاقوامی برادری کو ایران اور امریکہ کے درمیان مذاکراتی عمل کی مزید حمایت کرنی چاہیے۔ چین ہمیشہ اس موقف پر قائم رہا ہے کہ خطے کے ممالک کو اپنے مستقبل کا فیصلہ خود کرنا چاہیے، بات چیت اور مشاورت کے ذریعے ایسا علاقائی امن و سلامتی کا ڈھانچہ تشکیل دینا چاہیئے جس میں خطے کے تمام ممالک کی شمولیت ہو۔وانگ ای نے مزید کہا کہ چین پاکستان کے ساتھ مل کر مشرق وسطیٰ میں امن، استحکام اور ترقی کی جلد بحالی کے لیے اپنی تعمیری کوششیں جاری رکھنے کا خواہاں ہے۔