جاپان کی “نئی قسم کی عسکریت پسندی” علاقائی امن و استحکام کے لیے خطرہ ہے، چینی وزارت خارجہ

بیجنگ :چین کی وزارت خارجہ کے ترجمان گو جیاکھون نے یومیہ پریس کانفرنس میں جاپان کی جانب سے یوکرین کے لئے امداد پر تبصرہ کرتے ہوئے کہا کہ حالیہ برسوں میں، جاپان بھرپور طریقے سے “دوبارہ عسکریت پسندی” ، درمیانے اور طویل فاصلے تک مار کرنے والے طاقتور جارحانہ ہتھیاروں کی ترقی اور مہلک ہتھیاروں کی برآمدات پر پابندیوں کے خاتمے کو فروغ دے رہا ہے، اپنی سیلف ڈیفنس فورسز کی سرگرمیوں کے دائرے کو وسعت دے رہا ہے اور حقیقی لڑائی کے قابل جنگی نظام تشکیل دینے میں مصروف ہے۔ یہ جاپانی آئین، بین الاقوامی قوانین و ضوابط نیز “صرف دفاع” کے اصول کی خلاف ورزی کرتا ہے، دوسری جنگ عظیم کے بعد کے بین الاقوامی نظم و نسق کو چیلنج کرتا ہے، اور ایک “پرامن قوم” کے طور پر جاپان کے خود ساختہ تشخص کے منافی ہے۔ ترجمان نے اس بات پر زور دیا کہ جاپان کی “نئی قسم کی عسکریت پسندی” زور پکڑ رہی ہے، جو خطے میں امن و استحکام کے لیے خطرہ ہے۔ بین الاقوامی برادری کو اس حوالے سے انتہائی چوکس رہنا چاہیے اور اسے ثابت قدمی کے ساتھ روکنا چاہیے۔