چین ہمیشہ کمبوڈیا کے لیے سب سے مضبوط دوست کے طور پر موجود رہے گا، چینی وزیر خارجہ

بیجنگ :چین کے وزیر خارجہ وانگ ای نے بیجنگ میں کمبوڈیا کے نائب وزیراعظم اور وزیرخارجہ پراک سوک ہون اور نائب وزیراعظم سن چنتھول سے ملاقات کی۔ یہ دونوں رہنما کمبوڈیا کی پیپلز پارٹی کے چیئرمین اور سینیٹ کے صدر ہن سین کے دورۂ چین کے موقع پر ان کے ہمراہ تھے۔وانگ ای نے کہا کہ چین ہمیشہ کمبوڈیا کے لیے سب سے مضبوط تزویراتی سہارا، سب سے قابلِ اعتماد شراکت دار اور مشترکہ مستقبل کے حامل آہنی دوست کے طور پر موجود رہے گا۔انہوں نے کہا کہ دونوں ممالک کو ترقی اور سلامتی کے تقاضوں کو ہم آہنگ کرتے ہوئے سیاسی اور معاشی تعاون کو مزید گہرا کرنا چاہیے اور دوطرفہ تعلقات کے مفہوم کو مسلسل مضبوط بنانا چاہیے تاکہ چین۔کمبوڈیا مشترکہ مستقبل کی حامل برادری کی تعمیر میں نئی پیش رفت حاصل ہو۔ انہوں نے مزید کہا کہ چین کمبوڈیا کی جانب سے صدر شی جن پھنگ کی طرف سے پیش کردہ انسانیت کے مشترکہ مستقبل کے تصور اور چار عالمی اقدامات کی حمایت کو سراہتا ہے۔ چین کمبوڈیا کے ساتھ بین الاقوامی اور علاقائی امور میں اسٹریٹجک تعاون بڑھانے، گلوبل ساؤتھ کے مشترکہ مفادات کے تحفظ اور خطے اور دنیا میں امن و ترقی کے فروغ کے لیے مشترکہ کردار ادا کرنے کا خواہاں ہے۔کمبوڈیا کےنائب وزیراعظم اور وزیرخارجہ پراک سوک ہون نے کہا کہ کمبوڈیا چین کے ساتھ اپنے تعلقات کو بڑی قدر کی نگاہ سے دیکھتا ہے۔ عالمی و علاقائی امور میں چین کے انتہائی اہم کردار کو سراہتا ہے اور چین کے ساتھ مل کر دونوں ممالک کے رہنماؤں کے درمیان طے پانے والے اہم اتفاقِ رائے پر عمل درآمد کے لیے چین کے ساتھ مل کر کام کرنے اور کثیر الجہتی نظام اور بین الاقوامی تعلقات کے بنیادی اصولوں کے تحفظ کے لیے تیار ہے۔ سن چنتھول نے کہا کہ کمبوڈیا چین کی کمپنیوں کی جانب سے ملک میں سرمایہ کاری اور کاروباری سرگرمیوں کا خیرمقدم کرتا ہے اور اس کے لیے محفوظ اور دوستانہ کاروباری ماحول فراہم کرنے کی پوری کوشش کرے گا۔