وفاقی وزیر چوہدری سالک حسین کی خصوصی ہدایت پر محنت کش خاندانوں کے لیے تاریخ ساز اقدام

یہ اقدام محض تعلیمی سہولیات میں اضافہ نہیں بلکہ محنت کش طبقے کے لیے ریاست کے اعتماد، احترام اور روشن مستقبل کی ضمانت ہے۔

وفاقی وزیر چوہدری سالک حسین نے کہا کہ یہ تاریخی اقدام وزیراعظم محمد شہباز شریف کی قیادت میں حکومت کے اس عزم کا عملی اظہار ہے کہ ملک کے ہر محنت کش خاندان کو ترقی اور خوشحالی کے یکساں مواقع فراہم کیے جائیں۔

انہوں نے کہا کہ”پاکستان کی ترقی صرف صنعتوں سے وابستہ نہیں، بلکہ اُن محنت کشوں کے بچوں کی تعلیم سے جڑی ہوئی ہے جو ان صنعتوں کو اپنے خون پسینے سے چلائے رکھتے ہیں۔ آج ہم صرف ایک لاکھ مزید بچوں کو تعلیمی سہولت فراہم نہیں کر رہے، بلکہ ایک لاکھ خاندانوں کو امید، وقار اور بہتر مستقبل دے رہے ہیں۔”

وفاقی وزیر چوہدری سالک حسین  نے کہا کہ حکومت اس بات پر یقین رکھتی ہے کہ تعلیم ہر بچے کا بنیادی حق ہے، نہ کہ کسی مخصوص طبقے کا استحقاق۔ محنت کشوں کے بچوں کو بھی وہی مواقع حاصل ہونے چاہئیں جو معاشرے کے دیگر بچوں کو میسر ہیں۔

انہوں نے زور دے کر کہا کہ اس منصوبے کے ذریعے ملک بھر میں تعلیمی رسائی کو مزید وسعت دی جائے گی تاکہ کوئی بھی مستحق بچہ محض مالی مشکلات کی وجہ سے تعلیم سے محروم نہ رہے۔

چوہدری سالک حسین نے اس عزم کا اعادہ کیا کہ ورکرز ویلفیئر فنڈ کو ایک جدید، مؤثر اور عوام دوست ادارہ بنایا جائے گا، جہاں ہر پالیسی اور ہر اقدام کا مرکز محنت کش اور اس کا خاندان ہوگا۔

انہوں نے اپنے پیغام کے اختتام پر کہا کہ*”جس ہاتھ نے پاکستان بنایا، اب اُس کے بچے پاکستان کا مستقبل لکھیں گے۔”*

*ایک لاکھ خواب، ایک تاریخی فیصلہ، ایک روشن پاکستان۔*