سعودی عرب ‘فیکٹری میں آگ لگنے سے 16 مزدور جاں بحق ہوگئے

اسلام آباد (نیوز ڈیسک)ریاض میں صوفہ بنانے والی ایک فیکٹری میں اچانک آگ بھڑک اٹھنے کے نتیجے میں 16 بنگلادیشی تارکینِ وطن جان کی بازی ہار گئے۔

بنگلادیش کی وزارتِ مہاجرین کی بہبود و اوورسیز ایمپلائمنٹ نے فائر سروس حکام کے حوالے سے حادثے میں ہونے والی ہلاکتوں کی تصدیق کی ہے۔عرب میڈیا کے مطابق افسوسناک واقعے پر بنگلادیش کے وزیر برائے تارکینِ وطن کی بہبود و اوورسیز ایمپلائمنٹ عارف الحق چوہدری نے گہرے دکھ اور افسوس کا اظہار کیا۔ ان کا کہنا تھا کہ روزگار کے سلسلے میں سعودی عرب جانے والے افراد کی اس طرح اچانک اور المناک موت انتہائی افسوسناک ہے۔بنگلادیشی وزارت کے مطابق جاں بحق ہونے والے افراد میں سے 10 کا تعلق شمالی ضلع نوگاؤں سے تھا، جبکہ دیگر متاثرین کا تعلق نٹور اور راجشاہی کے علاقوں سے بتایا گیا ہے۔حکام کے مطابق سعودی عرب میں موجود بنگلادیشی سفارتخانہ حادثے کے مقام اور مقامی انتظامیہ کے ساتھ مسلسل رابطے میں ہے۔

متعلقہ اداروں کو ہدایت دی گئی ہے کہ جاں بحق افراد کی میتیں جلد از جلد بنگلادیش منتقل کرنے کے انتظامات کیے جائیں۔بنگلادیشی حکومت نے متاثرہ خاندانوں کو ضروری سرکاری معاونت اور دستیاب معاوضہ فراہم کرنے کے لیے بھی اقدامات تیز کرنے کی ہدایت کی ہے۔