آئی ایم ایف فنڈز کی منظوری معاشی بحالی کے سفر میں پاکستان کیلئے بڑی خوشخبری ہے ،احسن بختاوری

اسلام آباد(نیوزڈیسک)اسلام آباد چیمبر آف کامرس کے صدر احسن بختاوری نے کہا ہے کہ آئی ایم ایف فنڈز کی منظوری معاشی بحالی کے سفر میں پاکستان کیلئے بڑی خوشخبری ہے ، نگران وزیر اعظم ،آرمی چیف ،وزیر خزانہ سمیت پوری معاشی ٹیم اس کامیابی پر مبارکباد کی مستحق ہے ۔
اپنے ایک بیان میں صدر آئی سی سی آئی احسن ظفر بختاوری نے کہا کہ نگران حکومت کے اقدامات کی وجہ سے پاکستان معاشی بحالی کی راہ پر گامزن ہو چکا ہے ، آئی ایم ایف قسط کے اجرا سے روپے کی قدر میں بہتری ، اسٹاک مارکیٹ میں مزید استحکام آئے گا ، آئی ایم ایف پروگرام کی اصلاحات کے ساتھ تکمیل معاشی استحکام کیلئے ناگزیر ہے ،
احسن بختاوری نے کہا کہ بزنس کمیونٹی معاشی بہتری کیلئے حکومت اور پاک فوج کے تمام فیصلوں کی پشت پر کھڑی ہے ، انتخابات کے بعد آنے والی حکومت طویل المدتی اصلاحاتی پیکج کے تحت معاشی پالیسیوں کا تسلسل برقرار رکھے ۔