اسلام آباد: پاکستان مسلم لیگ (ق) خواتین ونگ کی مرکزی صدر و رکن قومی اسمبلی مسز فرخ خان نے گلگت بلتستان کے 79ویں یومِ آزادی کے موقع پر علاقے کے عوام کو مبارکباد پیش کرتے ہوئے کہا ہے کہ یکم نومبر ہماری قومی تاریخ کا ایک اہم اور قابلِ فخر دن ہے۔ ہم ان بہادر سپوتوں کی جرات، بہادری اور عظیم قربانیوں کو سلام پیش کرتے ہیں جنہوں نے ڈوگرہ راج سے آزادی حاصل کرنے کے لیے تاریخی جدوجہد کی اور پاکستان سے وابستگی کا روشن باب رقم کیا۔
اپنے پیغام میں فرخ خان نے کہا کہ پاکستان مسلم لیگ (ق) کے صدر چوہدری شجاعت حسین ہمیشہ گلگت بلتستان کے عوام کی حب الوطنی، جرات اور قربانیوں کو قدر کی نگاہ سے دیکھتے ہیں۔ مسلم لیگ (ق) گلگت بلتستان کے عوام کی ترقی، خوشحالی اور بنیادی حقوق کی فراہمی کو ہمیشہ اہمیت دیتی رہی ہے۔
انہوں نے کہا کہ مسلم لیگ (ق) کے سابقہ دورِ حکومت میں گلگت بلتستان میں سڑکوں، مواصلاتی نظام اور بنیادی انفراسٹرکچر کی ترقی کے لیے اہم اقدامات کیے گئے۔ اس دور میں علاقے کی ترقی اور عوام کو بہتر سہولیات کی فراہمی کے لیے مختلف منصوبوں پر کام کیا گیا، جبکہ 2007ء میں متعارف کرائے گئے اصلاحاتی پیکیج کے ذریعے مقامی حکومت کے اختیارات اور انتظامی معاملات میں بہتری کی راہ بھی ہموار ہوئی۔
فرخ خان نے کہا کہ گلگت بلتستان کے عوام، بالخصوص نوجوان نسل، خواتین اور بچیاں پاکستان کا قیمتی سرمایہ ہیں۔ آزادی کے لیے دی گئی قربانیوں کا حقیقی احترام اسی صورت ممکن ہے جب علاقے کے ہر بچے کو معیاری تعلیم، ہر نوجوان کو روزگار کے مواقع اور ہر خاتون کو ترقی کے یکساں مواقع فراہم کیے جائیں۔انہوں نے کہا کہ گلگت بلتستان کی بچیوں کے خواب اور ان کا روشن مستقبل انتہائی اہمیت کا حامل ہے۔ انہیں تعلیم، صحت، جدید ٹیکنالوجی اور عملی زندگی میں آگے بڑھنے کے بھرپور مواقع ملنے چاہئیں تاکہ وہ ڈاکٹر، استاد، سائنسدان، کاروباری شخصیت، کھلاڑی اور عوامی نمائندہ بن کر ملک و قوم کی خدمت کر سکیں۔انہوں نے مزید کہا کہ خواتین اور بچیوں کے لیے معیاری تعلیمی اداروں، تربیت یافتہ اساتذہ، اسکالرشپس، محفوظ سفری سہولیات، ڈیجیٹل رسائی اور صحت کی معیاری سہولیات کی فراہمی وقت کی اہم ضرورت ہے۔ گلگت بلتستان کے دور دراز پہاڑی علاقوں میں رہنے والی خواتین کو بھی حمل اور زچگی کے دوران بروقت طبی سہولیات فراہم کی جانی چاہئیں۔
فرخ خان نے کہا کہ گلگت بلتستان کے نوجوانوں میں بے پناہ صلاحیتیں موجود ہیں اور وہ سیاحت، ٹیکنالوجی، زراعت، کھیل اور کاروبار کے شعبوں میں نمایاں کردار ادا کر سکتے ہیں۔ اس مقصد کے لیے انہیں جدید مہارتوں، انٹرنیٹ، مالی وسائل اور کاروباری مواقع تک رسائی فراہم کرنا ضروری ہے۔انہوں نے کہا کہ گلگت بلتستان کی خواتین جو دستکاری، چھوٹے کاروبار اور زراعت کے شعبوں سے وابستہ ہیں، ان کی محنت کو تسلیم کرنے، انہیں مناسب معاوضہ دینے اور معاشی طور پر خودمختار بنانے کے لیے عملی اقدامات کیے جانے چاہئیں۔
انہوں نے اس عزم کا اظہار کیا کہ گلگت بلتستان کے قدرتی حسن، بلند و بالا پہاڑوں، گلیشیئرز، دریاؤں اور ثقافتی ورثے کا تحفظ بھی ہماری مشترکہ ذمہ داری ہے۔ نوجوانوں اور خواتین کو ماحولیاتی تحفظ کی کوششوں میں بھرپور شریک کرنا وقت کی ضرورت ہے۔آخر میں مسز فرخ خان نے کہا کہ یومِ آزادی کے اس تاریخی موقع پر ہمیں عہد کرنا چاہیے کہ گلگت بلتستان کو ترقی، تعلیم، خوشحالی اور مساوی مواقع کا خطہ بنائیں گے، جہاں خواتین بااختیار ہوں، نوجوانوں کو آگے بڑھنے کے مواقع میسر ہوں اور ہر شہری عزت و وقار کے ساتھ زندگی گزار سکے۔ انہوں نے گلگت بلتستان کے عوام کے لیے امن، استحکام، خوشحالی اور روشن مستقبل کی دعا بھی کی۔
