آغدام، آذربائیجان :
پاکستان اور آذربائیجان نے نوجوانوں کی ترقی اور باہمی تعاون کو فروغ دینے کے لیے ایک تاریخی مفاہمتی یادداشت (MoU) پر دستخط کیے ہیں۔ یہ معاہدہ دونوں ممالک کے درمیان علاقائی شراکت داری اور نوجوانوں کی فلاح و بہبود کے لیے ایک اہم سنگِ میل قرار دیا جا رہا ہے۔
پاکستان کی جانب سے وزیرِاعظم یوتھ پروگرام (PMYP) کی فوکل پرسن محترمہ سید آمنہ بتول نے معاہدے پر دستخط کیے، جب کہ آذربائیجان کی نمائندگی مقامی نوجوانوں کے امور کے حکام نے کی۔ دستخطوں کی یہ تقریب آذربائیجان کے شہر آغدام میں یکم جولائی کو منعقد ہوئی۔
معاہدے کا مقصد نوجوانوں پر مرکوز پروگرامز، بین الثقافتی تبادلے، تربیتی مواقع اور علاقائی تعاون کو فروغ دینا ہے۔ اس MoU کے ذریعے دونوں ممالک نے نوجوان نسل کی صلاحیتوں کو اجاگر کرنے، باہمی سیکھنے کے مواقع فراہم کرنے اور پائیدار تعلقات قائم کرنے کے عزم کا اعادہ کیا ہے۔
یہ اقدام پاک-آذربائیجان تعلقات کو نئی جہت دینے کے ساتھ ساتھ خطے میں نوجوانوں کی سرگرم شمولیت اور قائدانہ صلاحیتوں کو پروان چڑھانے میں معاون ثابت ہوگا۔
