چین اور روس کا رابطہ، مشرقِ وسطیٰ کی صورتحال پر مشاورت

بیجنگ :چین کے وزیر خارجہ وانگ ای نے روسی ہم منصب سرگئی لاوروف سے ٹیلی فون پر رابطہ کیا، جس میں مشرقِ وسطیٰ کی موجودہ صورتحال پر تفصیلی تبادلۂ خیال کیا گیا۔پیر کے روز سرگئی لاوروف نے کہا کہ روس کو خطے میں مسلسل بگڑتی ہوئی صورتحال پر شدید تشویش ہے۔ انہوں نے زور دیا کہ جاری جنگی کارروائیاں فوری طور پر روکی جائیں اور مسائل کے بنیادی اسباب کو حل کرنے کے لیے سیاسی و سفارتی راستہ اختیار کیا جائے۔ ان کا کہنا تھا کہ اقوام متحدہ کی سلامتی کونسل کو اس ضمن میں تعمیری کردار ادا کرنا چاہیے۔ روس اس مقصد کے لیے چین کے ساتھ قریبی رابطہ اور ہم آہنگی جاری رکھنے کا خواہاں ہے۔ وانگ ای نے کہا کہ چین اور روس کو اقوام متحدہ کی سلامتی کونسل کے مستقل ارکان کے طور پر، حق و باطل کے معاملات میں انصاف کا مظاہرہ کرنا چاہیے، منطقی اور متوازن طرز عمل اپنانا چاہیے، اور بین الاقوامی برادری سے مزید حمایت حاصل کرنے کی کوشش کرنی چاہیے۔انہوں نے واضح کیا کہ چین ہمیشہ بین الاقوامی و علاقائی تنازعات کے حل کے لیے مذاکرات اور سیاسی ذرائع کی حمایت کرتا ہے۔انہوں نے مزید کہا کہ مشرقِ وسطیٰ کی صورتحال بدستور خراب ہو رہی ہے اور جنگ کا دائرہ پھیل رہا ہے، جبکہ آبنائے ہرمز میں جہاز رانی کے مسئلے کا بنیادی حل فوری جنگ بندی ہے۔ چین روس کے ساتھ مل کر سلامتی کونسل میں تعاون جاری رکھنے اور خطے میں کشیدگی کم کرنے کے لیے کوششیں جاری رکھے گا۔