لاہور :صوبائی وزیر صنعت و تجارت چوہدری شافع حسین سے گلوبل ٹریڈ اینڈ ایکسپو سینٹر پاکستان کے چیئرمین مظہر حسین نے ان کے آفس میں ملاقات کی۔ملاقات کے دوران پنجاب میں سرمایہ کاری اور بین الاقوامی تجارتی مواقع پر بات چیت ہوئی۔چیئرمین مظہر حسین نے اپنے ادارے کی معاشی سرگرمیوں سے آگاہ کیا اور بتایا کہ گلوبل ٹریڈ اینڈ ایکسپو سینٹر پاکستان اور امریکہ کے بروک لین چیمبر آف کامرس اینڈ انڈسٹری کے مابین باہمی تعاون کا معاہدہ ہوا ہے۔
صوبائی وزیر نے گلوبل ٹریڈ اینڈ ایکسپو سینٹر پاکستان اور بروک لین چیمبر آف کامرس اینڈ انڈسٹری کے ساتھ معاہدے پر مبارکباد دی۔صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہا کہ پنجاب کے سپیشل اکنامک زونز میں غیر ملکی سرمایہ کاروں کو خصوصی مراعات حاصل ہیں ،خصوصی اقتصادی زونز میں سرمایہ کاری پر10 سال تک انکم ٹیکس کی چھوٹ اور ایک مرتبہ ڈیوٹی فری مشینری کی درآمد کی سہولت موجود ہے،گلوبل ٹریڈ اینڈ ایکسپو سینٹر عالمی سرمایہ کاروں کو پنجاب میں سرمایہ کاری کے مواقع اور دستیاب سہولیات سے آگاہ کرے۔
صوبائی وزیر نے بتایا کہ پنجاب میں سازگار ماحول اور مثبت پالیسیوں کے باعث صنعتکاری کے عمل میں نمایاں تیزی آئی ہے،نئی انڈسٹری لگنے سے روزگار کے نئے مواقع پیدا ہوئے ہیں،سرامک انڈسٹری میں توسیع ہو رہی ہے ،آلات جراحی کی برآمدات بڑھانے کیلئے بے حد پوٹینشل موجود ہے۔انہوں نے کہا کہ انڈسٹری کی ضرورت اور صنعتکاروں کی ڈیمانڈ پر پنجاب میں نئی انڈسٹریل اسٹیٹ بن رہی ہیں،سیالکوٹ میں انڈسٹریل اسٹیٹ کی 100 فیصد کالونائزیش ہوچکی ہے اس لئے انڈسٹری کی ڈیمانڈ پر سیالکوٹ میں نئی انڈسٹریل اسٹیٹ بنائے کیلئے غیر زرعی زمین کی نشاندہی جلد ہو جائے گی۔
انہوں نے کہا کہ میں ایم او یو کی بجائے عملی اقدامات پر یقین رکھتا ہوں،گلوبل ٹریڈ اینڈ ایکسپو سینٹر پنجاب میں مینوفیکچرنگ کے صنعتی یونٹس لانے کیلئے اپنا کردار ادا کرے۔مظہر حسین نے کہا کہ چوہدری شافع حسین بزنس کمیونٹی کی زبردست خدمت کر رہے ہیں،ان کی کاوشوں سے پنجاب میں اربوں روپے کی غیر ملکی سرمایہ کاری آئی ہے۔پنجاب سرمایہ کاری بورڈ کے ڈائریکٹر ڈاکٹر عمران ہاشمی اور گلوبل ٹریڈ اینڈ ایکسپو سینٹر کے ڈائریکٹر انٹرنیشنل ٹریڈ لیاقت علی بھی ملاقات میں موجود تھے۔
