یورپی یونین چین کے قومی مفادات کے تحفظ کے عزم کو کم نہ سمجھے، چینی وزارت تجارت

بیجنگ :چین کی وزارت تجارت نے یورپی یونین کے سائبر سیکیورٹی قانون میں ترامیم کے مسودے پر اپنی رائے اور تبصرے باضابطہ طور پر یورپی کمیشن کو پیش کر دیے۔ چین کی وزارت تجارت کے ترجمان نے ترمیم کے مسودے پر تبصرہ کرتے ہوئے کہا کہ سائبر سیکیورٹی اور سپلائی چین سیکیورٹی کی آڑ میں اس مسودے میں توانائی، نقل و حمل اور آئی سی ٹی سمیت 18 شعبوں میں مخصوص ممالک اور سپلائرز کو یورپی یونین کی متعلقہ سپلائی چینز سے خارج کیا گیا ہے، جوکہ اقتصادی و تجارتی امور کو سیاسی رنگ دینے کی ایک واضح مثال ہے۔ خیال کیا جا رہا ہے کہ اس ڈرافٹ میں عالمی تجارتی تنظیم کے بنیادی اصولوں جیسا کہ موسٹ فیورڈ نیشن ٹریٹمنٹ اور خدمات میں تجارت پر مراعات کو کم کرنے کے یورپی یونین کے وعدوں کی بھی خلاف ورزی کی گئی ہے۔ چین نے اس حوالے سے اپنے تبصروں میں تجویز پیش کی کہ یورپی یونین “ہائی رسک سپلائیرز” کے تعین کے معیار اور اس سے متعلق پابندیوں کو حذف کرے یا ان میں بنیادی تبدیلیاں لائے۔ ترجمان نے زور دے کر کہا کہ چین کو امید ہے کہ یورپی یونین اس کے تبصروں اور مجوزہ ترامیم کو بہت اہمیت دے گی اور سنجیدگی سے ان پر غور کرے گی۔ اگر یورپی یونین چینی کمپنیوں کے ساتھ امتیازی سلوک کرتی ہے تو چین کے پاس جوابی اقدامات کے سوا کوئی چارہ نہیں ہوگا۔ ترجمان نے متنبہ کیا کہ یورپی یونین چین کے قومی مفادات اور کمپنیوں کے جائز حقوق کے تحفظ کے عزم کو کم نہ سمجھے۔