مسئلہ کشمیر کا حل اقوام متحدہ کی قراردادوں کے مطابق ہونا چاہیے، سید منظور احمد شاہ

مظفرآباد :سینئر حریت رہنما سید منظور احمد شاہ نے کہا ہے کہ مسئلہ کشمیر ایک دیرینہ اور حساس تنازع ہے جس کا حل اقوام متحدہ کی قراردادوں اور کشمیری عوام کی خواہشات کے مطابق ہونا چاہیے۔ انہوں نے اپنے ایک بیان میں کہا کہ کشمیری عوام گزشتہ کئی دہائیوں سے اپنے حقِ خودارادیت کے لیے بے مثال قربانیاں دے رہے ہیں، لیکن عالمی برادری کی خاموشی اس مسئلے کے حل میں سب سے بڑی رکاوٹ بنی ہوئی ہے۔انہوں نے کہا کہ کشمیر صرف ایک خطہ نہیں بلکہ ایک نظریہ اور جدوجہد کا نام ہے، جہاں ہر گھر نے آزادی کے لیے قربانی دی ہے۔ سید منظور احمد شاہ نے اس بات پر زور دیا کہ مسئلہ کشمیر کو طاقت کے ذریعے دبانے کی کوششیں کبھی کامیاب نہیں ہو سکتیں اور نہ ہی کشمیری عوام اپنے بنیادی حق سے دستبردار ہوں گے۔انہوں نے مزید کہا کہ بھارت کی جانب سے مقبوضہ کشمیر میں جاری انسانی حقوق کی خلاف ورزیاں عالمی قوانین کی صریح خلاف ورزی ہیں، جن پر فوری توجہ دینے کی ضرورت ہے۔ انہوں نے اقوام متحدہ، انسانی حقوق کی عالمی تنظیموں اور عالمی طاقتوں سے اپیل کی کہ وہ اس دیرینہ تنازع کے حل کے لیے عملی اقدامات کریں اور کشمیری عوام کو ان کا جائز حق دلانے میں کردار ادا کریں۔سینئر حریت رہنما نے کہا کہ کشمیری قیادت متحد ہے اور وہ ہر سطح پر اپنی جدوجہد جاری رکھے گی۔ انہوں نے اس عزم کا اظہار کیا کہ کشمیری عوام اپنی آزادی کی تحریک کو ہر حال میں منطقی انجام تک پہنچائیں گے اور اس مقصد کے لیے کسی بھی قربانی سے دریغ نہیں کریں گے۔آخر میں انہوں نے پاکستان کی سیاسی و عوامی حمایت کو سراہتے ہوئے کہا کہ پاکستان ہمیشہ کشمیریوں کے ساتھ کھڑا رہا ہے اور آئندہ بھی یہ حمایت مسئلہ کشمیر کے حل تک جاری رہے گی۔