ٹورنٹو (انٹرنیشنل ڈیسک ) کینیڈا کے شہر ٹورنٹو میں واقع امریکی قونصل خانے پر گزشتہ روز فائرنگ کی گئی۔ یہ رواں سال اس عمارت پر ہونے والا دوسرا حملہ ہے۔
ٹورنٹو پولیس کے مطابق فائرنگ کا واقعہ صبح تقریباً 4 بج کر 45 منٹ پر پیش آیا۔ ڈیوٹی پر موجود ایک پولیس اہلکار نے گولیوں کی آواز سننے کے بعد دیکھا کہ بغیر نمبر پلیٹ والی ایک سفید رنگ کی گاڑی تیز رفتاری سے موقع سے فرار ہو رہی ہے۔ فضائی معاونت کی عدم دستیابی اور مشتبہ گاڑی کی تیز رفتاری کے باعث پولیس نے ہائی وے کے قریب اس کا تعاقب روک دیا۔
فائرنگ کے نتیجے میں قونصل خانے کی بیرونی دیوار کو نقصان پہنچا، تاہم کسی جانی نقصان کی اطلاع نہیں ملی۔
یاد رہے کہ رواں سال 10 مارچ کو بھی ٹورنٹو میں واقع امریکی قونصل خانہ فائرنگ کا نشانہ بنا تھا۔ اس واقعے کے بعد پولیس نے تین مشتبہ افراد کو گرفتار کر لیا تھا، جبکہ قونصل خانے کے اطراف اضافی سیکیورٹی اہلکار بھی تعینات کیے گئے تھے۔
