چین کا فلسطین اور اسرائیل کے تنازعے میں تشدد کو روکنے پر زور

اقوام متحدہ میں چین کے مستقل مندوب فو چھونگ نے مسئلہ فلسطین پر سلامتی کونسل کے ہنگامی اوپن سیشن میں بین الاقوامی برادری پر زور دیا کہ وہ تصادم اور تشدد کو مکمل طور پر روکنے کے لیے پوری کوشش کرے۔ انہوں نے کہا کہ موجودہ علاقائی صورتحال کے شدید اتار چڑھاؤ کے پس منظر میں فلسطین کا مسئلہ نظر انداز یا چھوڑا نہیں جا سکتا۔ بین الاقوامی برادری کو تیزی سے اقدامات کرنے چاہئیں، تصادم اور تشدد کو روکنے کے لیے پوری قوت لگانی چاہیے، بے گناہ جانوں کو بچانا چاہیے اورعدل و انصاف کا تحفظ کرنا چاہیے۔ انہوں نے کہا کہ اسرائیل کو آبادکاری کی سرگرمیاں بند کرنا ہوں گی۔ چین اسرائیل اور متعلقہ فریقوں سے مطالبہ کرتا ہے کہ وہ غزہ کے جنگ بندی معاہدے پر مخلصانہ اور مکمل عمل درآمد کریں۔ چین اسرائیل سے بین الاقوامی انسانی قانون کی پابندی اور انسانی امدادی سامان کی رسائی پر عائد پابندیاں ختم کرنے کا مطالبہ کرتا ہے۔ ان فریقوں کو جو متاثرہ اطراف پر اہم اثر رکھتے ہیں، کشیدگی میں کمی کے لیے ٹھوس اقدامات کرنے چاہئیں۔فو چھونگ نے کہا کہ چین ہمیشہ کی طرح قومی قانونی حقوق کے حصول کے لیے فلسطینی عوام کے جائز نصب العین کی حمایت کرتا رہے گااور فلسطینی عوام کے مصائب کے جلد خاتمے ا ور خطے میں امن و امان کے لیے انتھک کوششیں جاری رکھے گا ۔