48ویں عالمی ہنر مقابلے کے لیے چینی وفد تشکیل

بیجنگ : 48واں عالمی ہنر مقابلہ 22 سے 27 ستمبر تک چین کے شہر شنگھائی میں منعقد ہوگا۔اس حوالے سے 23 اگست کو چینی وفد باضابطہ طور پر تشکیل دے دیا گیا ہے۔ چینی وفد 71 کھلاڑیوں سمیت 220 افراد پر مشتمل ہے جو تمام 64 ایونٹس میں شرکت کرے گا۔ کھلاڑیوں کا تعلق چین کے 21 صوبوں سے ہے، جن میں 58 مرد ، 13 خواتین، 49 طلبہ اور 22 ملازمین شامل ہیں۔ چینی کھلاڑیوں کی اوسط عمر 21 سال ہے، جبکہ سب سے کم عمر کھلاڑی 18 اور سب سے زیادہ عمر والے کھلاڑی 25 سال کے ہیں۔ چینی وفد کے لیے ایوارڈز کی تقریبات اور مقابلوں کے دوران پہننے والی یونیفارمز بھی حال ہی میں باضابطہ طور پر جاری کر دی گئی ہیں۔چین کی وزارتِ انسانی وسائل اور سماجی تحفظ کے متعلقہ حکام کے مطابق، رواں سال کے مقابلوں میں 64 ایونٹس ہوں گے، جو مینوفیکچرنگ، نقل و حمل، تعمیرات، معلومات ، تخلیقی اور خدمات سمیت چھ بڑے شعبوں کا احاطہ کریں گے۔ توقع ہے کہ رواں سال کے عالمی ہنر مقابلے کا پیمانہ ایک نیا ریکارڈ قائم کرے گا، جس میں تقریباً 70 ممالک اور خطوں کے 1,400 کھلاڑی حصہ لیں گے۔