نیویارک: امریکی صدر ڈونلڈ ٹرمپ نے اعلان کیا کہ انہوں نے "برابر محصولات” عائد کرنے کا فیصلہ کیا ہے، یعنی امریکہ اور اس کے تجارتی شراکت داروں کی جانب سے عائد کردہ ٹیرف کی شرح کو مساوی بنایا جائے۔ انہوں نے کہا کہ وہ ویلیو ایڈڈ ٹیکس سسٹم استعمال کرنے والے ممالک پر اضافی محصولات عائد کرنے پر غور کریں گے۔
اسی روز وائٹ ہاؤس کے اوول آفس میں ایک میمورنڈم پر دستخط کرتے ہوئے ٹرمپ نے کہا کہ امریکہ کی پالیسی "بڑے اور مستقل تجارتی خسارے کو کم کرنا” اور غیر ملکی تجارتی شراکت داروں کے ساتھ "دیگر غیر منصفانہ اور غیر متوازن تجارتی مسائل” کو حل کرنا ہے۔ میمورنڈم میں "برابر محصولات” کے نفاذ کے وقت کی وضاحت نہیں کی گئی ہے، تاہم وائٹ ہاؤس کے حکام کا کہنا ہے کہ صدر ٹرمپ جلد کارروائی کرنا چاہتے ہیں۔
یاد رہے کہ ڈونلڈ ٹرمپ نے 10 فروری کو ایک دستاویز پر دستخط کیے ، جس میں اسٹیل اور ایلومینیم کی تمام امریکی درآمدات پر 25فیصد ٹیرف کا اعلان کیا گیا تھا ، اور دعوی کیا گیا تھا کہ وہ چپس ، آٹوموبائلز ، فارماسیوٹیکلز اور دیگر مصنوعات پر نام نہاد "برابر محصولات” عائد کریں گے۔ کینیڈا، جرمنی اور جاپان سمیت امریکی اتحادیوں نے اس کی مخالفت کا اظہار کیا ہے۔
