میراں بلاک کی منتقلی عوامی خوشحالی کا آغاز ہے، انجینئر مطیع اللہ خان

اسلام آباد:پاکستان مسلم لیگ (ق)اسلام آباد کیپٹل کے سیکریٹری اطلاعات و نشریات اور معروف ایکسپلوریشن و ڈرلنگ ایکسپرٹ انجینئر مطیع اللہ خان نے میراں بلاک کے شئرز کی خیبر پختونخوا آئل اینڈ گیس کمپنی لمیٹڈ (KPOGCL) کو منتقلی کے حوالے سے اپنے بیان میں کہا ہے کہ یہ فیصلہ خیبر پختونخوا کے عوام کے لیے توانائی کے شعبے میں ایک تاریخی سنگِ میل ثابت ہوگا۔ میراں بلاک کے شئرز کی منتقلی سے صوبے میں تیل و گیس کی پیداواری صلاحیت میں نمایاں اضافہ ہوگا۔  انہوں نے کہا کہ یہ اقدام خیبر پختونخوا کی معاشی وژن اور سیاسی استحکام کی جانب ایک مثبت پیش رفت ہے۔ اس منصوبے سے توانائی، ایکسپلوریشن اور ڈرلنگ کے شعبوں میں نئی راہیں کھلیں گی، جس سے ملکی معیشت کو فائدہ پہنچے گا اور عوام کے لیے روزگار کے وسیع مواقع پیدا ہوں گے۔  انجینئر مطیع اللہ خان نے مزید کہا کہ یہ فیصلہ خیبر پختونخوا کے عوام کے لیے ترقی، خوشحالی اور استحکام کی نئی منزلوں تک رسائی کا امید افزا پیغام ہے، اور اس کے لیے وفاقی حکومت مبارکباد کی مستحق ہے۔