اسلام آباد:وفاقی وزیر اوورسیز پاکستانیز چوہدری سالک حسین سےمسلم لیگ(ق)کے صوبائی صدر انتخاب خان چمکنی کی قیادت میں اہم وفد نے تفصیلی ملاقات کی، جس میں ملک کی موجودہ سیاسی صورتحال، بالخصوص جنوبی خیبر پختونخوا کو درپیش مسائل پر جامع گفتگو کی گئی۔
وفد میں ضلع پہاڑپور کے صدر خان محمد وزیر، ضلعی رہنما ہارون اعوان ایڈوکیٹ اور ملک عمران بھی شامل تھے۔ملاقات کے دوران مجموعی قومی و سیاسی منظرنامے پر تبادلہ خیال کیا گیا اور آئندہ سیاسی حکمت عملی کے مختلف پہلوئوں پر غور کیا گیا۔
وفد نے جنوبی خیبر پختونخوا کے عوام کو درپیش بنیادی مسائل کو اجاگر کرتے ہوئے وفاقی وزیر کو تفصیلی بریفنگ دی۔
اس موقع پر امن و امان کی مخدوش صورتحال، ترقیاتی منصوبوں میں سست روی، بنیادی انفراسٹرکچر کی کمی، صحت و تعلیم کی ناکافی سہولیات اور بے روزگاری جیسے اہم امور پر خصوصی توجہ دلائی گئی۔وفد نے مقف اختیار کیا کہ جنوبی اضلاع کو طویل عرصے سے نظر انداز کیا جا رہا ہے جس کے باعث وہاں کے عوام شدید مشکلات کا شکار ہیں۔
انہوں نے مطالبہ کیا کہ علاقے میں امن و امان کی بہتری کے لیے مثر اقدامات کیے جائیں، ترقیاتی منصوبوں کے لیے خصوصی فنڈز مختص کیے جائیں اور تعلیمی اداروں و صحت کی سہولیات کو فوری طور پر بہتر بنایا جائے۔
وفاقی وزیر چوہدری سالک حسین نے وفد کی جانب سے پیش کیے گئے مسائل کو بغور سنا اور یقین دہانی کرائی کہ ان مسائل کے حل کے لیے متعلقہ حکام سے فوری رابطہ کیا جائے گا۔
انہوں نے کہا کہ حکومت پسماندہ علاقوں کی ترقی اور عوام کو بنیادی سہولیات کی فراہمی کے لیے سنجیدہ اقدامات کر رہی ہے اور جنوبی خیبر پختونخوا کے مسائل کو ترجیحی بنیادوں پر حل کیا جائے گا۔ملاقات کے اختتام پر باہمی رابطوں کو مزید مضبوط بنانے اور عوامی مسائل کے حل کے لیے مشترکہ کاوشیں جاری رکھنے پر اتفاق کیا گیا۔
