چینی وزیر خارجہ کی روسی ہم منصب سے ملاقات ،چین روس تعاون مزید مضبوط بنانے پر اتفاق

بیجنگ :چینی وزیرِ خارجہ وانگ ای نے بیجنگ میں روس کے وزیرِ خارجہ سرگئی لاوروف سے ملاقات کی، جو چین کے دورے پر ہیں۔بدھ کے روزوانگ ای نے کہا کہ چین اور روس کو دونوں ممالک کے رہنماؤں کے درمیان طے پانے والے اہم اتفاقِ رائے پر مکمل عمل درآمد کرنا چاہیے اور چین۔روس اسٹریٹجک شراکت داری کے تعلقات اور مختلف شعبوں میں باہمی مفاد پر مبنی تعاون کو مزید اعلیٰ سطح تک لے جانا چاہیے۔ انہوں نے کہا کہ دونوں ممالک کو اقوامِ متحدہ سمیت کثیرالجہتی پلیٹ فارمز پر تعاون کو مضبوط بنانا چاہیے، شنگھائی تعاون تنظیم کے قیام کی 25ویں سالگرہ کے موقع پر کرغزستان کی جانب سے اس سال کے سربراہی اجلاس کے انعقاد کی حمایت کرنی چاہیے، اور برکس ممالک کے اتحاد کو مضبوط بناتے ہوئے گلوبل ساوتھ کے جائز مفادات کا تحفظ کرنا چاہیے۔ انہوں نے مزید کہا کہ اہم عالمی و علاقائی امور پر اسٹریٹجک مشاورت جاری رکھتے ہوئے کثیرالجہتی نظام اور بین الاقوامی انصاف کو فروغ دینا اور عالمی کثیر قطبی نظام کی پیش رفت کو آگے بڑھانا ضروری ہے۔سرگئی لاوروف نے کہا کہ روس چین کے ساتھ مل کر دونوں ممالک کے رہنماؤں کے اتفاقِ رائے پر عمل درآمد کے لیے تیار ہے، اعلیٰ سطح کے روابط کو جاری رکھے گا، عملی تعاون کو مزید گہرا کرے گا اور باہمی مفاد کے اصول پر تعلقات کو آگے بڑھائے گا۔ انہوں نے کہا کہ دونوں ممالک کو کثیرالجہتی فورمز اور عالمی و علاقائی امور میں قریبی ہم آہنگی برقرار رکھنی چاہیے، اپنے اپنے قومی مفادات کا تحفظ کرنا چاہیے اور عالمی نظام کے استحکام کو یقینی بنانا چاہیے۔فریقین نے رواں سال کے دوران دونوں ممالک کے رہنماؤں کی ممکنہ ملاقات کی تیاریوں پر بھی تبادلۂ خیال کیا، جبکہ امریکہ۔ایران تنازع، ایشیا پیسیفک کی صورتحال اور یوکرین بحران سمیت اہم عالمی و علاقائی امور پر تفصیلی گفتگو کی گئی۔