چینی طرز کی سلامتی” پر اعتماد میں اضافہ

بیجنگ :اس سال یوم مئی کی تعطیلات کے دوران، چین کے صوبہ حوبے کے شہر ووہان کے لی یوان میٹرو اسٹیشن پر “بغیر نگرانی سامان کی دیوار” سوشل میڈیا پر خاصی مقبول ہو گئی۔ سیاح اپنے سفری بیگ اور سوٹ کیس اسٹیشن ہال کی دیوار کے ساتھ ترتیب سے رکھ کر بے فکری کے ساتھ گھومنے نکل جاتے تھے۔ مختلف رنگوں اور اقسام کے سوٹ کیسز سے بنی یہ “دیوار” بغیر کسی نگرانی کے بھی مکمل نظم و ضبط کا منظر پیش کر رہی تھی۔ چینی وزارت خارجہ کی ترجمان ماؤ نینگ نے بھی سوشل میڈیا پر اس منظر کی ویڈیو پوسٹ کرتے ہوئے “محفوظ اور بے فکر” کے الفاظ تحریر کیے، جس نے دنیا بھر کے انٹرنیٹ صارفین کی خوب توجہ حاصل کی۔ درحقیقت، سوشل میڈیا پرذرا سی سرچ کریں تو پتہ چلتا ہے کہ “بغیر نگرانی سامان کی دیواریں” یا بغیر نگرانی سامان رکھنے کے مقامات نہ صرف ووہان شہر میں پائے جاتے ہیں بلکہ چھانگ شا، فوشان، نان جنگ اور فو چو سمیت چین کے دیگر شہروں میں بھی موجود ہیں۔ تحفظ کا یہ احساس صرف سفری بیگز کے بارے میں نہیں ہے بلکہ یہ جامع “چینی طرز کی سلامتی” پر ہر ایک کے اعتماد اور فخرکا مظہر بھی ہے۔ ایک جانب سیاح خود نظم و ضبط کا مظاہرہ کرتے ہوئے سامان باقاعدگی سے رکھتے ہیں، راستے بند نہیں کرتے اور حتیٰ کہ آگ بجھانے کے آلات کے قریب بھی سامان رکھنے سے گریز کرتے ہیں، جبکہ دوسری جانب پولیس اہلکار اور میٹرو عملہ مسلسل گشت اور نگرانی کے ذریعے شہریوں کو مکمل تحفظ فراہم کرتا ہے۔ بغیرنگرانی کے سامان کی دیوار کے پیچھے طویل عرصے سے قائم سماجی تحفظ کی بنیاد ہے جو لوگوں کو ذہنی سکون فراہم کرتی ہے۔ دنیا بھر کے انٹرنیٹ صارفین بھلے ہی چینی حروف کو نہ سمجھیں، مگر وہ چین کی اس حقیقی، زندہ اور پرامن تصویر کو ضرور محسوس کر سکتے ہیں۔