چین کا ایران اور امریکا کے مابین پاکستان کی ثالثی کی کوششوں کی حمایت جاری رکھنے کا اعلان
اسلام آ باد :چین کے وزیر خارجہ وانگ ای نے پاکستانی نائب وزیر اعظم اور وزیر خارجہ اسحاق ڈار کے ساتھ فون پر گفتگو کی ۔بدھ کے روز چینی میڈیا کے مطابق اسحاق ڈار نے وانگ ای کو ایران اور امریکہ کے درمیان ہونے والے مذاکرات میں پاکستان کی ثالثی کی کوششوں کی حالیہ پیش رفت سے آگاہ کیا، مذاکرات کو فروغ دینے کے لیے پاکستان کی کوششوں کیع حمایت پر چین کا شکریہ ادا کیا، اور علاقائی امن و استحکام کو برقرار رکھنے کے لیے مشترکہ طور پر مثبت کردار ادا کرنےمیں چین کے ساتھ ہم آہنگی اور تعاون کو مضبوط بنانے کی امید ظاہر کی۔وانگ ای نے چین کے اصولی موقف کا اعادہ کیا، امریکہ ایران مذاکرات میں سہولت فراہم کرنے اور عارضی جنگ بندی میں توسیع کے سلسلے میں پاکستان کی کوششوں کو سراہا اور امید ظاہر کی کہ پاکستان اپنا اعتماد برقرار رکھے گا، اپنی ثالثی کی کوششوں کو تیز کرے گا اور آبنائے ہرمز کھولنے کے مناسب حل اور خطے میں امن کی جلد بحالی میں کردار ادا کرے گا جو بین الاقوامی برادری کی مشترکہ خواہش بھی ہے۔ انہوں نے کہا کہ چین پاکستان کی ثالثی کی کوششوں کی حمایت جاری رکھے گا اور اس سلسلے میں اپنی جانب سے بھی کوششیں کرے گا۔چینی وزیر خارجہ نے کہا کہ چند دنوں میں چین اور پاکستان کے سفارتی تعلقات کے قیام کی پچھترویں سالگرہ منائیں گے۔ دونوں فریقوں کو مشترکہ طور پر یادگاری سرگرمیوں کا اہتمام کرنا چاہیے، قریبی اعلیٰ سطحی تبادلے کو برقرار رکھنا چاہیے، تزویراتی روابط اور دوستی کو مضبوط کرنا چاہیے، عملی تعاون کو فروغ دینا چاہیے، ایک دوسرے کے بنیادی مفادات اور چین- پاکستان مشترکہ مفادات کا بہتر طور پر تحفظ کرنا چاہیے اور چین پاکستان چار موسموں کے اسٹریٹجک تعاون پر مبنی شراکت داری کو ایک نئی سطح پر لے جانا چاہیے۔اسحاق ڈار نے کہا کہ پاکستان دونوں ممالک کے درمیان سفارتی تعلقات کے قیام کی پچھترویں سالگرہ کے موقع سے فائدہ اٹھاتے ہوئے چین کے ساتھ ہمہ جہتی تعاون کو گہرا کرنے، کثیر الجہتی تعاون کو مضبوط بنانے اور پاکستان اور چین کے درمیان چار موسموں کے اسٹریٹجک تعاون پر مبنی شراکت داری کو ایک نئی سطح پر لے جانے کے لیے تیار ہے۔