بیجنگ: چینی وزارتِ دفاع کی معمول کی پریس کانفرنس میں ترجمان کرنل جیانگ بن نے فلپائن، امریکہ اور جاپان کے متعلقہ سمندری علاقے میں نام نہاد “مشترکہ گشت” کے حوالے سے تبصرہ کیا۔ انہوں نے کہا کہ متعلقہ ممالک کے درمیان دفاعی اور سیکیورٹی تعاون کسی تیسرے فریق کے خلاف نہیں ہونا چاہئے اور نہ ہی اس سے علاقائی امن و استحکام کو نقصان پہنچنا چاہیے۔
ترجمان نے کہا کہ جزیرہ ہوانگ یان چین کا اٹوٹ حصہ ہے۔ فلپائن چاہے کوئی بھی اقدام کرے یا اپنی حمایت میں کسی کو بھی ساتھ شامل کرے، اس سے حقائق تبدیل نہیں ہو سکتے اور فلپائن کے غیر قانونی عزائم کسی صورت کامیاب نہیں ہوں گے۔
ترجمان نے مزید کہا کہ چینی فوج ہر وقت مکمل چوکس ہے اور کسی بھی قسم کی خلاف ورزی یا اشتعال انگیز کارروائی کا بھرپور جواب دے گی۔ چینی فوج عملی اقدامات کے ذریعے ملک کی علاقائی خودمختاری، سمندری حقوق و مفادات کا تحفظ اور بحیرۂ جنوبی چین میں امن و استحکام برقرار رکھنے کے لیے پرعزم ہے۔
