چین کا بیانیہ تعاون اور باہمی کامیابی پر زور دیتا ہے، چینی میڈیا

واشنگٹن : امریکی پیو ریسرچ سینٹر  نے اپنے ایک سالانہ سروے کے نتائج جاری کیے۔ سروے میں شامل 36 ممالک اور خطوں میں سے 27 کے عوام نے چین کے بارے میں مثبت رائے کا اظہار کیا، جو امریکہ کے مقابلے میں زیادہ رہی۔ پیو ریسرچ سینٹر کے مطابق تقریباً گزشتہ 20 برسوں میں یہ عالمی رائے عامہ میں آنے والی نمایاں ترین تبدیلیوں میں سے ایک ہے۔ اس موضوع پر مختلف ممالک کے ذرائع ابلاغ مسلسل تبصرے کر رہے ہیں۔آسٹریلیا کی ویب سائٹ “پرلز اینڈ اِریٹیشنز” نے پیو سروے کا حوالہ دیتے ہوئے لکھا کہ جن ممالک میں چین کے حوالے سے  رائے میں نمایاں تبدیلی آئی ہے، ان میں وہ ممالک بھی شامل ہیں جو گزشتہ پانچ برسوں کے دوران چین کے بارے میں نسبتاً زیادہ منفی نقطۂ نظر رکھتے تھے، جن میں آسٹریلیا، کینیڈا، جنوبی کوریا اور سویڈن شامل ہیں۔ رپورٹ کے مطابق 17 متوسط آمدنی والے ممالک میں عوام کو چین کے مقابلے میں امریکہ کی خارجہ پالیسی پر زیادہ تشویش ہے، جبکہ گلوبل ساؤتھ کے ممالک میں چین اور اس کی قیادت کے بارے میں مثبت رائے زیادہ نمایاں ہے۔ سروے کے مطابق نوجوانوں کی رائے بھی چین کے بارے میں نسبتاً زیادہ مثبت ہے۔دی جاپان ٹائمز نے اپنی رپورٹ میں کہا کہ چین کا بیانیہ تعاون، مشترکہ مفاد اور باہمی کامیابی پر زور دیتا ہے اور عالمی نظام میں موجود عدم توازن کو دور کرنے کی حمایت کرتا ہے، جبکہ امریکہ بظاہر موجودہ عالمی توازن کو برقرار رکھنے کی پالیسی پر کاربند دکھائی دیتا ہے۔امریکی اخبار دی ہِل نے اپنی ایک رپورٹ میں لکھا کہ پیو ریسرچ سینٹر کا یہ سروے اس بات کا اشارہ ہے کہ عالمی سطح پر امریکہ کی قیادت پر اعتماد میں کمی آ رہی ہے اور دنیا میں امریکہ کا تاثر چین کے مقابلے میں کمزور پڑ رہا ہے۔