آوارہ کتوں کیخلاف ایکشن نہ لینےپر مظاہرین نے انتظامیہ کے دفتر میں کتے چھوڑ دیے

اسلام آباد (نیوز ڈیسک) بھارت میں آوارہ کتوں کے مسئلے پر انوکھا احتجاج سامنے آیا،

جہاں مظاہرین نے انتظامیہ کی جانب سے کارروائی نہ ہونے پر سرکاری دفتر میں ہی کتے چھوڑ دیے۔

بھارتی ریاست مہاراشٹرا کے ضلع ناسک کے علاقے نپھاڑ میں آوارہ کتوں کی بڑھتی تعداد کے خلاف شہریوں نے احتجاج کیا اور معاملہ انتظامیہ کے سامنے اٹھانے کے لیے نگر پنچایت کے چیف آفیسر دھیرج بھامرے کے دفتر پہنچ گئے۔

احتجاج کے دوران یوا سینا کے ضلعی سربراہ وکرم راندھوے نے ایک بوری سے کتے نکال کر چیف آفیسر کی میز پر چھوڑ دیے، جس کے باعث دفتر میں صورتحال غیر معمولی ہوگئی۔

مظاہرین نے بعد میں چیف آفیسر کو نوٹوں کی مالا پہنانے کی کوشش بھی کی۔ ان کا مؤقف تھا کہ انتظامیہ کو آوارہ کتوں کے مسئلے کی سنگینی کا احساس دلانے کے لیے یہ منفرد طریقہ اختیار کیا گیا۔

مظاہرین کے مطابق علاقے میں آوارہ کتوں کی تعداد میں اضافے کے باعث بچوں، خواتین اور بزرگوں کو شدید مشکلات کا سامنا ہے، جبکہ موٹر سائیکل اور دیگر گاڑیاں چلانے والے افراد بھی ان کتوں کے باعث پریشانی میں مبتلا ہیں۔

ان کا مزید کہنا تھا کہ کتوں کے کاٹنے کے واقعات بھی معمول بنتے جا رہے ہیں، لیکن بارہا توجہ دلانے کے باوجود انتظامیہ کی جانب سے مسئلے کے مستقل حل کے لیے خاطر خواہ اقدامات نہیں کیے گئے۔

رپورٹ کے مطابق مظاہرین نے مطالبہ کیا کہ شہریوں کو آوارہ کتوں سے درپیش خطرات ختم کرنے کے لیے فوری اور مؤثر کارروائی کی جائے۔