ایران کی رجائی بندرگاہ پر ہونے والے زوردار دھماکے میں 500 سے زائد افراد زخمی ہوگئے جن میں سے 4 کے ہلاک ہونے کی تصدیق کردی گئی۔
عالمی خبر رساں ادارے کے مطابق یہ خوفناک دھماکا جنوبی ایران کے شہر بندر عباس کی شہید رجائی بندرگاہ سے منسلک دفتر میں ہوا۔
اس بندرگاہ کا شمار ایران کے بڑے شپنگ اڈوں اور ایران میں سب سے اہم بندرگاہوں سے ہے. ایران کی سرکاری خبر رساں ایجنسی کے مطابق، ایران کے غیر تیل سامان کی درآمدات و برآمدات کا 55 فیصد سے زیادہ حصہ اسی بندرگاہ ترسیل کیا جاتا ہے. اس کے علاوہ، یہ بندرگاہ ایران کے کنٹینر ہینڈلنگ کے 85فیصد سے زیادہ کے لئے ذمہ دار ہے.
دھماکے کے بعد بندرگاہ کے ایک حصے میں آگ بھڑک اُٹھی۔ جائے وقوعہ پر فائر بریگیڈ کی گاڑیوں اور ایمبولینسوں کو جاتے ہوئے دیکھا جا سکتا ہے۔
امدادی کاموں کا سلسلہ جاری ہے۔ متضاد اطلاعات کے مطابق دھماکے میں زخمیوں کی تعداد 500 سے زائد ہوگئی۔
ابتدائی طور پر 4 ہلاکتوں کی تصدیق کی گئی تاہم ہلاکتوں میں اضافے کا خدشہ ظاہر کیا جا رہا ہے۔
دھماکے کی شدت اس قدر زیادہ تھی کہ کئی کلومیٹر دور واقع عمارتوں کے شیشے بھی ٹوٹ گئے اور متعدد علاقوں میں زلزلے جیسے جھٹکے محسوس کیے گئے۔
پولیس کا کہنا ہے کہ دھماکے کی وجوہات تاحال معلوم نہیں ہو سکیں۔ اس حوالے سے تحقیقات جاری ہیں۔
