لاہور:گورنر بلوچستان جعفر مندوخیل نے صدر پاکستان مسلم لیگ (ق) اور سابق وزیراعظم چوہدری شجاعت حسین سے ان کی رہائش گاہ پر خصوصی ملاقات کی۔
ملاقات میں صوبائی وزیر چوہدری شافع حسین اور کمال مندوخیل بھی شریک تھے۔ملاقات کے دوران بلوچستان کی موجودہ سیاسی، سماجی اور مجموعی امن و امان کی صورتحال پر تفصیلی تبادلۂ خیال کیا گیا۔
گورنر بلوچستان نے گفتگو کرتے ہوئے بتایا کہ صوبے میں سول انتظامیہ اور پاک فوج کے درمیان بہتر ہوتی کوآرڈینیشن کے باعث امن و امان کی صورتحال میں نمایاں بہتری آ رہی ہے، جس کے مثبت اثرات عوامی زندگی پر بھی مرتب ہو رہے ہیں۔
اس موقع پر گورنر جعفر مندوخیل نے چوہدری شجاعت حسین کی قومی خدمات کو خراجِ تحسین پیش کرتے ہوئے کہا کہ چوہدری شجاعت حسین نے ہمیشہ مشکل اوقات میں ملک کی خدمت کی اور ان کا کردار ناقابلِ فراموش ہے۔
انہوں نے کہا کہ ان کے باہمی تعلقات شہید چوہدری ظہور الٰہی کے دور سے چلے آ رہے ہیں، جو اعتماد اور اخلاص پر مبنی ہیں۔گورنر بلوچستان نے صوبائی وزیر چوہدری شافع حسین کے مثبت سیاسی کردار اور صوبائی سطح پر کی جانے والی کاوشوں کو بھی سراہا۔
اس موقع پر صدر پاکستان مسلم لیگ (ق) اور سابق وزیراعظم چوہدری شجاعت حسین نے گورنر بلوچستان کی کارکردگی پر اعتماد کا اظہار کیا اور سیاسی استحکام کے لیے تمام سیاسی جماعتوں کے درمیان ہم آہنگی کو مزید مضبوط بنانے پر زور دیا۔ انہوں نے امید ظاہر کی کہ مشترکہ کوششوں کے نتیجے میں بلوچستان کے حالات جلد بہتر ہوں گے۔
