چینی نمائندے کی ایران کے مرحوم سپریم لیڈر آیت اللہ علی خامنہ ای کی آخری رسومات میں شرکت

بیجنگ :چین کی قومی عوامی کانگریس کی قائمہ کمیٹی کے نائب چیئرمین حہ وی نے چین کی نمائندگی کرتے ہوئے تہران میں ایران کے مرحوم سپریم لیڈر آیت اللہ علی خامنہ ای کی آخری رسومات میں شرکت کی۔ اس موقع پر ایرانی صدر مسعود پیزشکیان اور پارلیمنٹ کے اسپیکر باقر قالیباف نے حہ وی سے الگ الگ ملاقاتیں کیں۔ہفتہ کے روز حہ وی نے کہا کہ چین، آیت اللہ علی خامنہ ای کے المناک انتقال پر گہرے دکھ اور افسوس کا اظہار کرتا ہے اور ایران کی حکومت، عوام اور مرحوم سپریم لیڈر کے اہل خانہ سے دلی تعزیت اور ہمدردی کا اظہار کرتا ہے۔ انہوں نے امید ظاہر کی کہ نئے سپریم لیڈر مجتبیٰ خامنہ ای کی قیادت میں ایران جلد از جلد امن، استحکام اور ترقی کی راہ پر گامزن ہوگا۔ انہوں نے کہا کہ چین، ایران کے ساتھ مل کر دونوں ممالک کے جامع اسٹریٹجک شراکت داری کے تعلقات کو مزید مستحکم اور دیرپا بنانے کے لیے کام کرنے کا خواہاں ہے۔ حہ وی نے کہا کہ چین، ایران اور امریکہ کے درمیان مفاہمتی یادداشت پر دستخط کا خیرمقدم کرتا ہے اور امید رکھتا ہے کہ دونوں فریق طے شدہ نتائج پر عمل درآمد کرتے ہوئے جنگ بندی برقرار رکھیں گے، منطقی اور عملی رویہ اختیار کریں گے اور مذاکرات کی پیش رفت کو مزید مضبوط بنائیں گے۔ انہوں نے یہ بھی کہا کہ چین کو امید ہے کہ آبنائے ہرمز کے مسئلے کا مناسب حل نکالا جائے گا اور خطے کے ممالک باہمی ہم آہنگی اور خوشگوار تعلقات کے ساتھ رہیں گے۔ ایرانی رہنماؤں نے آیت اللہ علی خامنہ ای کی آخری رسومات میں اعلیٰ سطح چینی نمائندہ وفد کی شرکت پر چین کا شکریہ ادا کیا اور کہا کہ ایران، چین کی جانب سے فراہم کی جانے والی دیرینہ قیمتی حمایت کو ہمیشہ یاد رکھے گا۔ انہوں نے اس عزم کا اظہار کیا کہ ایران، چین کے ساتھ رابطے اور ہم آہنگی کو مزید فروغ دے گا اور دونوں ممالک کے تعلقات کو نئی بلندیوں تک لے جائے گا۔