چین کی ویزا فری پالیسی کامیاب، غیر ملکی سیاحوں کی تعداد میں ریکارڈ اضافہ

بیجنگ:(چائنا ڈیسک ) چین کی ریاستی کونسل کے انفارمیشن آفس میں گزشتہ روز منعقدہ پریس کانفرنس کے دوران جاری کیے گئے اعداد و شمار کے مطابق رواں سال کی پہلی ششماہی کے دوران چین میں غیر ملکی شہریوں کے 2 کروڑ 29 لاکھ 14 ہزار سے زائد داخلے ریکارڈ کیے گئے، جن میں 1 کروڑ 78 لاکھ 15 ہزار سے زیادہ افراد ویزا فری پالیسی کے تحت چین میں داخل ہوئے۔ یہ تعداد گزشتہ سال کے مقابلے میں بالترتیب 20.4 فیصد اور 30.6 فیصد زیادہ ہے، جبکہ سرحد پار آمدورفت معاشی ترقی کے لیے ایک نئی محرک قوت بن کر سامنے آئی ہے۔ گرمیوں کی تعطیلات شروع ہونے کے بعد بیرونِ ملک سے آنے والے سیاحوں کی تعداد میں مسلسل اضافہ دیکھا جا رہا ہے، خصوصاً یورپی ممالک سے آنے والے مسافروں کی تعداد میں نمایاں اضافہ ہوا ہے۔ شدید گرمی کے موسم میں بڑی تعداد میں غیر ملکی سیاح ٹھنڈے موسم سے لطف اندوز ہونے کے لیے چین کا رخ کر رہے ہیں۔ موسمِ گرما کے دوران صوبہ حونان کا معروف سیاحتی مقام چانگ جیا جے اپنی خوشگوار آب و ہوا اور عالمی شہرت یافتہ قدرتی مناظر کی بدولت غیر ملکی سیاحوں کی توجہ کا مرکز بن گیا ہے۔ یورپ، جنوب مشرقی ایشیا اور دیگر کئی ممالک سے آنے والے سیاح پہاڑی علاقوں میں قدرتی حسن، ٹھنڈی ہواؤں اور دلکش ماحول سے لطف اندوز ہو رہے ہیں۔دوسری جانب موسمِ گرما کی تعطیلات کے آغاز سے شین زین ہوائی اڈے سے یورپ کے نو ممالک کے لیے چلنے والی متعدد بین الاقوامی پروازوں کی مانگ میں مسلسل اضافہ ریکارڈ کیا گیا ہے۔ جون سے اب تک شین زین ایئرپورٹ کے ذریعے یورپی ممالک سے آنے والے مسافروں کی تعداد گزشتہ سال کے مقابلے میں 31.6 فیصد بڑھ گئی ہے۔سیاحت سے متعلق ادارے “سی ٹرپ” کے اعداد و شمار کے مطابق رواں سال موسمِ گرما کے دوران چین آنے والے غیر ملکی سیاحوں کے اعتبار سے دنیا کے سرفہرست 20 ممالک اور خطوں میں یورپی ممالک کا حصہ 30 فیصد رہا، جبکہ یورپ سے آنے والے سیاحوں کی بکنگ گزشتہ سال کے مقابلے میں 275 فیصد بڑھ گئی ہے۔