سید علی گیلانی کے الفاظ، ’پاکستان ہمارا ہے‘ دل و دماغ میں ہمیشہ گونجتے رہیں گے:خالد مجید

حریت لیڈر سید علی گیلانی کی دوسری برسی کے موقع پر سعودی عرب میں پاکستانی قونصل جنرل خالد مجید نے کہا کہ سید علی گیلانی ہمت اور استقامت کا پیکر تھے، انہوں نے کشمیریوں کے حقوق کے لیے انتھک محنت کی ۔ ان کی قربانیاں اورغیر متزلزل عزم ہم سب کو ہمیشہ متاثر کرتا رہے گا۔ آج ہم بہادر کشمیری عوام کی قربانیوں کو خراج تحسین پیش کرتے ہوئے ان کے ساتھ مکمل اظہار یکجہتی کرتے ہیں۔
ہمیں کشمیری آبادی کے خلاف جاری مظالم اور خلاف ورزیوں پر غور کرنا چاہیے اور جموں و کشمیر میں غیر قانونی قبضے کی واضح الفاظ میں مذمت کرنی چاہیے۔ حکومت پاکستان کشمیری عوام کی جدوجہد کی حمایت کے لیے اپنے غیر متزلزل عزم کا اعادہ کرتی ہے۔
انہوں نے کہا کہ عالمی برادری سے مطالبہ کرتے ہیں کہ وہ دیرینہ تنازعہ کشمیر کو اقوام متحدہ کی قراردادوں کے مطابق حل کرنے میں اپنا کردار ادا کرے۔ ضروری ہے کہ کشمیری عوام کو ان کا بنیادی حق خود ارادیت دیا جائے۔
سید علی گیلانی کے متاثر کن الفاظ، "ہم پاکستانی ہیں، پاکستان ہمارا ہے” ہمارے دل و دماغ میں ہمیشہ گونجتے رہیں گے۔ اج اس عہد کی تجدید کرتے ہیں کہ ہم اپنے کشمیری بھائیوں اور بہنوں کے شانہ بشانہ ان کی جائز امنگوں کی وکالت کرنے کے لیے انتھک کاوشیں کریں گے اور ہر جائز ذریعہ بروئے کار لائیں گے۔ ہم سب کو مل کر ایک ایسے مستقبل کی طرف کام کرناہے جہاں کشمیری عوام اپنی تقدیر کا خود فیصلہ کر سکیں اور امن اور ہم آہنگی سے رہ سکیں۔