چینی وزارت خارجہ کا سرتاج عزیز کے انتقال پر گہرے رنج و غم کا اظہار

بیجنگ (نیوزڈیسک)چین کی وزارت خارجہ کے ترجمان وانگ ون بین نے یومیہ پریس کانفرنس میں پاکستان کے سابق وزیر خزانہ سرتاج عزیز کے انتقال پر تبصرہ کرتے ہوئے کہا کہ سرتاج عزیز پاکستان میں سینئر سیاست دان، اسٹریٹجسٹ ،ماہر اقتصادیات اور چینی عوام کے پرانے اور اچھے دوست تھے۔انہوں نے اپنی زندگی کے دوران طویل عرصے تک خود کو پاکستان کی خوشحالی اور طاقت کے لئے وقف کیا، جوش و جذبے سے چین پاکستان تعلقات کی ترقی کو فروغ دینے کے لئے اپنی پوری کوشش کی، اور چین پاکستان دوستانہ تعاون، خاص طور پر چین پاکستان اقتصادی راہداری کے آغاز اور تعمیر میں نمایاں کردار ادا کیا.وانگ ون بین نے کہا کہ ہم سرتاج عزیز کے انتقال پر گہرے رنج و غم کا اظہار کرتے ہیں اور ان کے اہل خانہ سے دلی تعزیت کا اظہار کرتے ہیں۔