اسلام آباد:پاکستان تحریک انصاف کے رہنما رئوف حسن اسلام ٓآباد میں نامعلوم افراد کے حملے میں زخمی ہوگئے ۔ تفصیلات کے مطابق رئوف حسن پر نامعلوم افراد نےبلیڈ سے حملہ کیا، رئوف حسن جی سیون مرکز میں ٹی وی چینل کے دفتر سے نکلے تو نامعلوم افراد نے حملہ کردیا ۔ رئوف حسن کو ہسپتال منتقل کردیا گیا۔
ابتدائی رپورٹس کے مطابق ترجمان پی ٹی آئی پر نامعلوم افراد نےحملہ کیا اور موقع سے فرار ہوگئے۔
رؤف حسن جی سیون میں نجی ٹی وی چینل کے دفتر سے جونہی باہر نکلے تو نامعلوم افراد نے ان پر حملہ کردیا جس سے وہ زخمی ہوگئے، ان چہرے پر زخم آیا اور خون بہنے لگا۔
واقعہ کے فوری بعد نجی ٹی وی چینل کے اسٹاف کے کچھ لوگ باہر آگئے اور رؤف حسن کو اندر لے گئے۔
دوسری جانب پاکستان تحریک انصاف کے رہنما شبلی فراز نے رؤف حسن پر نامعلوم افراد کے حملے کا کا معاملہ ایوان بالا سینیٹ میں اٹھا دیا۔
سینیٹ میں اپوزیشن لیڈر شبلی فراز نے کہا کہ مجھے رؤف حسن پر حملے کی اطلاع ملی ہے، رؤف حسن پر حملہ کرکے انہیں زخمی کیا گیا ہے، یہ واقع سنجیدہ معاملہ ہے، بات یہاں تک آگئی ہے کہ سب سے بڑی جماعت کے ترجمان پر حملہ کیا گیا ہے۔
وفاقی وزیر قانون اعظم نذیر تارڑ نے کہاکہ وزیر داخلہ اس وقت ایوان میں موجود نہیں، میں ان سے یا آئی جی سے معلومات لے کر ایوان کو آگاہ کرتا ہوں۔
انہوں نے کہاکہ رؤف حسن پر حملے کے معاملے پر قانون کے مطابق عملدرآمد ہوگا۔
پاکستان تحریک انصاف کے ارکان نے پارٹی ترجمان پر نامعلوم افراد کے حملے کے خلاف ایوان بالا سے احتجاجاً واک آؤٹ کردیا۔
حملہ کرنے والے کون تھے؟
نجی ٹی وی کے مطابق حملہ کرنے والے 5 سے 6 خواجہ سرا تھے، خواجہ سراؤں کی جانب سے رؤف حسن کے چہرے پر بلیڈ سے حملہ کیا گیا۔
ذرائع کے مطابق پولیس کی جانب سے تحقیقات جاری ہیں، پولیس نجی چینل کے باہر سی سی ٹی وی فوٹیجز بھی حاصل کر رہی ہے۔
