قونصل جنرل دبئی کی سمندر پار پاکستانیوں کی خدمات کی ستائش، انڈیکس ایکسچینج کی "روشن پاکستان” مہم کا آغاز
دبئی : قونصل جنرل پاکستان، حسین محمد نے بیرونِ ملک مقیم پاکستانیوں کو ایک قیمتی قومی اثاثہ قرار دیتے ہوئے قانونی ذرائع سے ترسیلاتِ زر کے ذریعے ملکی معیشت کے استحکام میں ان کے مسلسل کردار کی تعریف کی ہے۔ ان خیالات کا اظہار انہوں نے دبئی میں انڈیکس ایکسچینج کے زیرِ اہتمام شروع کی جانے والی آگاہی مہم "اب کی بار — روشن پاکستان کی بہار” کی افتتاحی تقریب سے خطاب کرتے ہوئے کیا۔ انہوں نے واضح کیا کہ قانونی راستوں سے بھیجی گئی رقوم پاکستان کی معیشت کو نمایاں طور پر مضبوط بناتی ہیں اور پائیدار قومی ترقی میں مددگار ثابت ہوتی ہیں۔
انہوں نے مزید کہا کہ یہ مہم نہ صرف تارکینِ وطن کی کوششوں کا اعتراف ہے بلکہ ایک روشن اور خود کفیل مستقبل کی جانب ایک مثبت قدم ہے، جس میں ماحول دوست توانائی (گرین انرجی) کے حل کو خاص اہمیت دی گئی ہے۔
انڈیکس ایکسچینج کے ایگزیکٹو ڈائریکٹر، ہمایوں مراد نے اس موقع پر گفتگو کرتے ہوئے کہا کہ ان کا ادارہ ہمیشہ سے جدید اور مؤثر مالیاتی خدمات کی فراہمی کے ساتھ ساتھ قومی ترقی میں اپنا حصہ ڈالنے کے لیے کوشاں رہا ہے۔ انہوں نے "روشن پاکستان” مہم کو ایک دور اندیش اقدام قرار دیا جس کا مقصد ترسیلاتِ زر میں اضافے کے ساتھ ساتھ توانائی کے متبادل ذرائع، خاص طور پر سولر پاور کو فروغ دینا ہے تاکہ پاکستان کے توانائی کے مسائل کا طویل مدتی حل نکالا جا سکے۔ اسی طرح ٹریڈ اینڈ انویسٹمنٹ قونصلر، علی زیب خان نے کہا کہ ایسی مہمات ترسیلاتِ زر کے نظام کو مستحکم کرنے کے ساتھ ساتھ سرمایہ کاری اور پائیدار ترقی کے نئے مواقع فراہم کرتی ہیں۔ انہوں نے پاکستان کی معاشی ترقی اور توانائی کے شعبے کے چیلنجز سے نمٹنے کے لیے گرین انرجی کے منصوبوں کی ضرورت پر زور دیا۔
چیف آپریٹنگ آفیسر، سید عبدالسلام نے کہا کہ یہ مہم محض ایک تجارتی اشتہار نہیں بلکہ صارفین کو مالی سہولیات کے ساتھ ساتھ ایک پائیدار مستقبل کی طرف راغب کرنے کا ایک وسیع وژن ہے۔ انہوں نے اعادہ کیا کہ سولر انرجی وقت کی اہم ضرورت بن چکی ہے اور انڈیکس ایکسچینج اس تبدیلی کا حصہ بننے پر فخر محسوس کرتا ہے۔ چیف بزنس آفیسر، میر کے رسول نے تبصرہ کیا کہ ہر ترسیلِ زر محنت، خلوص اور ذمہ داری کی ایک کہانی ہوتی ہے، اور اس مہم کے ذریعے ان کہانیوں کو ایک نیا رخ دیا جا رہا ہے جہاں ہر ٹرانزیکشن خاندانوں کی مدد کے ساتھ ساتھ انہیں توانائی کے شعبے میں خود مختاری کی طرف لے جائے گی۔
تقریب میں پریس قونصلر صالح محمد سمیت پاکستانی کمیونٹی کے نمایاں رہنماؤں اور معززین نے بڑی تعداد میں شرکت کی۔ اس مہم کے تحت انڈیکس ایکسچینج کے ذریعے پاکستان رقم بھیجنے والے صارفین کو قرعہ اندازی کے ذریعے اپنے گھروں میں سولر پینل سسٹم لگوانے کا موقع ملے گا، جس کا مقصد انفرادی کوششوں کو قومی ترقی سے جوڑنا ہے۔ تقریب کا اختتام اس پر اثر پیغام پر ہوا: "جو دل ہے، جو ہے جاں — آؤ کریں روشن پاکستان”۔