چین غیر ملکی کمپنیوں کے لیے مزید سہولیات کی فراہمی جاری رکھے گا ، چینی وزارتِ خارجہ

بیجنگ : چین کی وزارتِ خارجہ کے ترجمان لین جیان نے معمول کی پریس بریفنگ میں کہا کہ چین اعلیٰ سطح کے بیرونی کھلے پن کی پالیسی پر ثابت قدمی سے عمل جاری رکھے گا ۔امریکہ۔چین بزنس کونسل اور چین میں جرمن چیمبر آف کامرس کی رپورٹس پر تبصرہ کرتے ہوئے ترجمان نے واضح کیا کہ چین کے ساتھ تعاون مواقع فراہم کرتا ہے یا خطرات پیدا کرتا ہے، اس بارے میں سب سے بہتر رائے خود کاروباری ادارے دے سکتے ہیں۔ انہوں نے کہا کہ تحفظ پسندی کو اپنانا ہے یا مسابقت اور جدت کے ذریعے ترقی حاصل کرنی ہے، اس کا جواب بھی کمپنیوں نے اپنے عملی فیصلوں سے دے دیا ہے۔چین کا جامع صنعتی نظام، متنوع اطلاقی منڈیاں، اعلیٰ معیار کی افرادی قوت اور مسلسل بہتر ہوتی کاروباری پالیسیوں کا ماحول دنیا بھر کی کمپنیوں کے لیے جدت طرازی کے زبردست مواقع فراہم کرتا ہے۔انہوں نے کہا کہ زیادہ سے زیادہ غیر ملکی کمپنیاں "تحقیق و ترقی چین میں” کے ماڈل کو اختیار کر رہی ہیں اور چین میں قائم اپنی پیداواری تنصیبات کو جدت اور نئی ٹیکنالوجی کے مراکز میں تبدیل کر رہی ہیں۔ترجمان نے مزید کہا کہ غیر ملکی کمپنیاں چین کی وسیع منڈی کو ایک ایسے "جم” کے طور پر استعمال کر رہی ہیں جہاں وہ اپنی صلاحیتوں کو نکھارتی اور عالمی مسابقت کو مزید مضبوط بناتی ہیں۔انہوں نے زور دیا کہ چین کھلے پن کی اپنی پالیسی کو مزید وسعت دے گا اور غیر ملکی کاروباری اداروں کو چین میں تحقیق، اختراع اور سرمایہ کاری کے لیے زیادہ سازگار ماحول فراہم کرتا رہے گا۔