تمام ممالک اپنی ترقیاتی راہ کا آزادانہ انتخاب کرنے کا حق رکھتے ہیں، چینی وزیر خارجہ

اقوام متحدہ :چین کے وزیر خارجہ وانگ ای نے نیو یارک میں اقوام متحدہ کے ہیڈکوارٹر میں "گلوبل گورننس فرینڈز گروپ” کےاجلاس میں شرکت کی۔جمعہ کے روز اس موقع پر انہوں نے کہا کہ گروپ کے قیام کے بعد سے رکن ممالک نے گلوبل گورننس میں اصلاحات اور بہتری کے حوالے سے وسیع تبادلۂ خیال کیا ہے، جس کے نتیجے میں پانچ اہم اتفاقِ رائے سامنے آئے ہیں۔پہلا، تمام ارکان بین الاقوامی تعلقات میں جمہوریت کے فروغ کے حامی ہیں۔ ان کا ماننا ہے کہ تمام ممالک، خواہ وہ بڑے ہوں یا چھوٹے، طاقتور ہوں یا کمزور، امیر ہوں یا غریب، اپنی سماجی اور ترقیاتی راہ کا آزادانہ انتخاب کرنے کا حق رکھتے ہیں اور انہیں عالمی گورننس کے عمل میں مساوی شرکت، مساوی فیصلہ سازی اور مساوی فوائد حاصل ہونے چاہئیں۔دوسرا، اقوام متحدہ کے منشور کے مقاصد اور اصولوں کا تحفظ کیا جائے اور اس بات کو یقینی بنایا جائے کہ بین الاقوامی قانون اور بین الاقوامی قواعد و ضوابط کا یکساں اور منصفانہ اطلاق ہو۔ اس سلسلے میں دوہرے معیار اور دوسروں پر اپنی مرضی مسلط کرنے کی مخالفت کی گئی ہے۔ تیسرا، اقوام متحدہ کے مرکزی کردار کا تحفظ کیا جانا چاہیے، کثیرالجہتی نظام پر عمل درآمد کو فروغ دینا چاہیے اور کثیرالجہتی اداروں کو مضبوط بنایا جانا چاہیے، جبکہ یکطرفہ طرزِ عمل اور طاقت کی سیاست کی مخالفت کی جانی چاہیے۔ چوتھا، عالمی گورننس میں اصلاحات کے ذریعے شمال۔جنوب کے درمیان فرق کو بتدریج کم کیا جائے، ترقی کے ثمرات تمام عوام تک پہنچائے جائیں اور کسی بھی ملک کو ترقی کے سفر میں پیچھے نہ چھوڑا جائے۔ پانچواں، عالمی برادری کو ان عملی مسائل کے حل پر توجہ دینی چاہیے جو دنیا کے لیے سب سے زیادہ اہمیت رکھتے ہیں، اور ایسے ٹھوس اقدامات کیے جائیں جن کے واضح نتائج سامنے آئیں تاکہ عالمی گورننس کا نظام وقت اور عوام دونوں کی آزمائش پر پورا اتر سکے۔